Gipakusgan sa Probinsyal nga Panggamhanan sa Davao del Norte, ubos sa liderato ni Governor Edwin I. Jubahib, ang pagpangandam batok kalamidad ug ang kapasidad sa pagtubag sa panahon sa emerhensiya.

Gipahigayon ang usa ka Training of Trainers (TOT) alang sa Camp Coordination and Camp Management ug Internally Displaced Persons Protection (CCCM-IDPP) sulod sa lima ka adlaw, gikan Septyembre 1 hangtod 5, sa Cris Inn, Apokon Road, Tagum City.

Mitambong ang 54 ka partisipante nga gilangkoban sa mga social workers, kapulisan, ug mga personahe gikan sa Disaster Risk Reduction and Management Offices sa nagkalain-laing lungsod ug siyudad.

Nahinabo usab ang pagbahin sa lima ka grupo diin ang mga partisipante nagtinabangay sa pagbinayloay og mga ideya ug praktis aron makab-ot ang tukmang aksyon sa pag-atubang sa kalamidad ug pagpanalipod sa mga Internally Displaced Persons. Gipasabot ni Social Welfare Officer II Lennon Remotigue, usa sa mga resource speaker gikan sa DSWD Field Office XI ang kamahinungdanon ug tumong sa training.

“Ang focus ani nga training mahatagan og capacity building ang atoang mga LSWDO kung unsa ang angayan buhaton panahon nga adunay disaster, panahon nga adunay IDPs (Internally Displaced Persons) sulod sa ilang mga evacuation center ug kini pud nagahatag sa atoa og pagpasabot kung unsa ang mga programa ug serbisyo nga pwede nato ihatag o i-deliver towards the affected population,” ingon ni Remotigue.

Samtang, sa maong training unom ka mga modules ang ilang  gitutokan alang sa mas epektibong pagdumala sa pasilidad ug serbisyo panahon sa kalamidad.

Writer: Lorna Tripoli