Nagpasundayag og sistematikong proseso sa pagluwas ug pag-atiman sa mga biktima ang mga rescuers atol sa mass casualty simulation exercise nga gipahigayon sa Capitol Oval, Davao del Norte Sports and Tourism Complex sa Tagum City, niadtong Septiyembre 11.

Nipartisipar sa pagbansay ang Bureau of Fire Protection, Davao del Norte Provincial Police Office, City ug Provincial Disaster Risk Reduction and Management Offices (CDRRMOs/PDRRMO), mga health authorities gikan sa Kapalong, Asuncion, ug IGACOS District Hospitals, ug mga estudyante sa Tagum Comprehensive National High School. Nagpakita sila sa paspas ug organisadong pagresponde sa daghang mga biktima panahon sa emerhensiya nga mahimong resulta sa natural o man-made incidents.

Sa wala pa ang simulation, nagpahigayon ang Provincial Health Office ug PDRRMO og lima ka adlaw nga Mass Casualty Management Responders Training. Sumala ni Dr. Dominic Basalo, Provincial Health Officer I sa PHO, nga ang pagbansay nagtinguha nga mahashasan ang kapasidad sa mga health workers ug medical frontliners aron andam sila motubag sa daghang mga mangaangol.

“Aron matagaan nato og kapasidad ang atoang mga health workers and health professionals, aron ma-equip sila maging preparado moresponde sa gitawag nato’g mass casualty incident... Dapat kabalo sila mo-manage in terms of mass casualty and ready ang atoang mga participants labi na sa mga hospital settings, dapat kabalo na sila mo-handle when it comes to mass casualty,” ingon ni Dr. Basalo.

Atol sa simulation, gitukod ang usa ka Casualty Collection Point (CCP) diin giila ug giihap ang mga biktima sa triage team ug dayon gipaabot ngadto sa Field Medical Commander. Gisiguro sa mga safety officers ang kaluwasan sa palibot, samtang ang mga nurses ug doctors mitabang dayon sa ospital human madala sa mga ambulansya ang mga biktima.

Writer: Lorna Tripoli