Luhaan ug puno sa pagpasalamat ang mga benepisyaryo sa Emergency Shelter Assistance human ilang nadawat ang pinansyal nga tabang gikan sa probinsya.

Gitunol ni Provincial Governor Edwin I. Jubahib, pinaagi sa iyang Chief of Staff nga si Jandil Romano, ang kinatibuk-ang P175,000 ngadto sa 28 ka mga benepisyaryo atol sa seremonya nga gihimo sa PGO Conference Room, Septyembre 22.

Usa sa mga nakadawat mao si Rivalyn Tibog, taga-Binansian, Asuncion, nga nasunogan ug walay nasalbar sa iyang panimalay. Gisaysay niya ang nahitabong sunog sa ilang panimalay, ug mapasalamaton sa gobernador sa P10,000 nga cash assistance nga dakong tabang alang sa iyang pamilya.

“Nagsugod siya sa kusina, naay nabilin nga kalayo ug wala ko kabantay nga naay kalayo naabot sa among bongbong kay amakan ra man amoang balay... Dako siyang tabang sa amoa nga makasugod mi’g tukod sa among balay... Salamat kaayo sa serbisyo ni Gov. Edwin Jubahib,” sulti ni Tibog.

Samtang, ang uban pang mga benepisyaryo nakadawat og P3,000 alang sa partially damaged houses ug P5,000 alang sa mas dako nga kadaot. Apil usab ang mga pamilya nga naapektuhan sa ipo-ipo sa IGACOS ug duha ka mga distressed overseas Filipino workers.

Mitambong usab sa kalihokan si Executive Assistant IV Charry Jubahib, nga nagrepresentar kang Vice Governor Clarice Jubahib. Sulti niya nga adunay pabahay program isip kabahin sa P100 milyon nga loan sa Land Bank of the Philippines. Alang kini sa mga nawad-an og panimalay ug uban pang mga nanginahanglan.

“Sa administrasyong Jubahib-Jubahib naa gyud ang kasingkasing sa mag-ama nga kutob sa mahimo, kutob sa Makaya, mohatag gyud og tabang sa mga nanginahanglan... Mo-update na lang pud mi bahin sa Vice Governor's Office. Niadtong niaging session naaprobahan ang gi-request sa atoang executive department nga P100 milyon nga loan sa Land Bank para usab na sa Pabahay Program ni Kuya Gov nga iyang gisaad sa mga katawhan,” ingon ni Jubahib.

Writer: Lorna Tripoli