Nagdasok ang mga baryohanon sa Barangay Datu Balong, San Isidro aron makapahimulos sa libreng mga serbisyo nga gitunol sa Probinsyal nga Panggamhanan sa Davao del Norte ubos sa liderato ni Gobernador Edwin I. Jubahib pinaagi sa OPLAN Kaagapay sa Kalinaw ug Kalamboan (OPLAN KKK) niadtong Septyembre 19.

Lakip sa mga gipanghatag nga serbisyo mao ang medikal nga konsultasyon, libreng gupit, eye check-up ug libreng eyeglasses, ibot sa ngipon, x-ray sa baga, tambag legal, ug libreng tsinelas, school bags, bugas, ug daghan pang uban.

Gisuportahan ang maong kalihokan sa nagkadaiyang ahensya sa gobyerno sama sa Philippine Statistics Authority (PSA), Department of Social Welfare and Development (DSWD), Philippine Health Insurance Company, ug kapulisan sa Davao del Norte Provincial Police Office (DDNPPO). Misalmot usab ang Provincial Health Office ug ubang nasudnong ahensya.

Usa ka hamubong programa ang gipahigayon isip pagsugod sa kalihokan, diin mitambong ang mga department heads sa kapitolyo, Board Member Ronald Eliot, Board Member Tristan Royce Aala, ug mga opisyales sa barangay uban sa opisina sa gobernador.

Writer: Lorna Tripoli