Giduso ni Governor Edwin I. Jubahib ang pagmugna og Special Inspection Team aron imbestigahan ang dagkong national projects nga giimplementar sa Davao del Norte. Ang maong sugyot giaprubahan atol sa joint meeting sa Provincial Development Council (PDC) ug Provincial Peace and Order Council (PPOC) niadtong Septyembre 18 sa DavNor Gym.
Lakip sa imbestigahan ang giingong P516-M nga Tuganay Bridge sa Carmen, ang 15 ka mega projects sa probinsya, ug uban pang national projects.
“Para wala’y bias nga mahitabo during the inspection, atong ipakita, kaya gani gi-include nako ang provincial projects kadtong 15 mega projects sa province, gipaapil sa inspection ug ang sa DPWH ug National Irrigation Authority projects,” matod ni Gov. Jubahib.
Giaprubahan usab sa konseho ang pipila ka resolusyon sama sa pagbabag sa renewal sa prankisa sa NORDECO nga mahuman sa tuig 2028, ang pagpangayo og financial ug status report sa P1 bilyon nga loan alang sa giingong pagbutang sa submarine cable gikan Pantukan ngadto sa IGACOS, ug ang paghangyo sa Senate Blue Ribbon Committee ug Senate Energy Committee nga motutok sa imbestigasyon bahin sa giingong loan sa NORDECO.
Butyag sa gobernador nga ang tumong sa inspection team mapasakaan og tukmang kaso ang mga contractor ug ahensya nga pakyas nipatuman sa mga proyekto.
“Mao ang atong himoon nga inspection, to see to it that the national budget and provincial local budget was implemented, nga tama ang pagka-implement, kung dunay mga discrepancy nga atong makita. So, mao ‘ni atong mahimoa’g report and sa atoa pa lang level pwede na ‘ta mo-file og kaso sa mga contractors ug sa mga agencies involved,” dugang sa gobernador.
Samtang, giaprubahan usab ang pagrekomenda sa random drug testing sa tanang government institutions, public, ug private schools, subay kini sa nagapadayong kampanya sa probinsya batok ilegal nga droga.
Writer: Lorna TripoliPhotos: Kuya Gov Edwin Jubahib Fb page
