Gisulti ni Provincial Governor Edwin "Kuya Gob" Jubahib nga iyang napatuman 100% ang tanang proyekto sa Davao del Norte gikan sa agrikultura hangtod sa imprastruktura. Gipahayag niya kini sa iyang mensahe sa katawhan atol sa OPLAN Kaagapay sa Kalinaw ug Kalamboan (OPLAN KKK) nga gipahigayon niadtong Septyembre 23 sa Igangon Gym, San Isidro.

Kahibaloan, nga nahimong nasudnong isyu ang mga proyekto nga gipatuman sa nasyonal tungod sa mga gidudahang ghost project sa ubang dapit. Gipaniguro sa gobernador nga wala’y kwarta nga nawagtang atol sa implementasyon sa mga proyekto sa probinsya.

“Ug ang serbisyo sa atong probinsya walay kawat, tinud-anay gyud ‘ni nga serbisyo. Wala’y pagpangawat... Sa atong probinsya, 100% gyud ang atong gi-implement nga mga proyekto sa agrikultura ug proyekto sa infrastructure,” ingon ni Gov. Jubahib.

Dugang sulti sa gobernador nga pagahimoon niini ang imbestigasyon sa mga proyekto sa nasyonal nga giimplementa sa Department of Public Works and Highways (DPWH) ug National Irrigation Authority (NIA) aron masiguro ang husto ug transparent nga paggasto sa pondo.

Samtang, gipangunahan ni Gov. Jubahib ang OPLAN KKK serbisyo sa kapitolyo nga gidala sa kabarangayan sa Kipalili, Sabangan, ug Igangon. Bitbit niini ang nagkadaiyang serbisyo sama sa libreng konsultasyong medikal, tambag legal, libreng gupit, eyeglasses, school bags para sa mga bata, bugas ug uban pang kinahanglanon, ug anti-rabies vaccine para sa mga hayop.

Writer/Photo: Lorna Tripoli