Gipasiugdanhan sa Probinsyal nga Panggamhanan sa Davao del Norte ang National Filipino Family Week 2025 sa probinsya niaging Septyembre 26, pinaagi sa mga kalihokan nga nagpunting sa pagpalig-on sa relasyon ug responsibilidad sa pamilya.
Giorganisa kini sa Provincial Social Welfare and Development Office (PSWDO) uban sa Department of Social Welfare and Development (DSWD). Ang selebrasyon gisugdan sa usa ka Parent Effectiveness Seminarsa buntag ug gisundan sa Awarding Ceremony pagkahapon.
Sa iyang mensahe, si PSWDO Head Rosalinda Rapista nagpahimangno nga bisan nag-uswag na ang teknolohiya, kinahanglan mamentinar gihapon ang suod ug matinud-anong relasyon sulod sa pamilya.
“Ang pamilya gyud is the basic unit of the society, nga hinaut nga kung ikompara nato sauna nga dili hi-tech vs karon. Dako kaayo’g kalahian. Pero dili gyud na siya rason kay lahi man sauna, so dapat lahi pud karon. Mamentinar gyud nato kung unsa gyud ang atong relationship within the family, nga i-value gyud nato ang tanan,” ingon ni Rapista.
Ang Millomeda family sa Panabo City gipanganlan nga Huwarang Pamilya 2025 sa probinsyahuman sila mailhan isip modelong pamilya nga nakatukod og lig-on nga relasyon ug nagpakita og aktibong partisipasyon sa komunidad.
“Happy kaayo kay from municipality lang namo nga naay 40 ka barangays, kami gyud ang family nga mao gyuy na-awardan. Sa municipality namo kami ang na-Huwarang Pamilya, proceed diri sa provincial. So, wala mi magdahom nga kami maoy nahimong winner,” matod ni Dyndee Millomeda kauban iyang bana nga si Efren, kinsa dungang nagpasalamat sa 4Ps program nga nakatabang sa ilang pagpanikad ug nahimong inspirasyon sa komunidad.
“Pagrespeto, pagminahalay namo sa isigka-ginikanan. Sa pagmatuto sa mga bata, sa pagtudlo sa mga matarong nga butang. Mao na among sekreto. Unang-una sa pagsalig namo sa Labawng Makakagahum,” butyag ni Efren.
Si Rev. Andrew Macad sa Fundamental Baptist Church, ang guest speaker sa Parent Effectiveness Seminar, mipatin-aw usab sa kaimportante sa pagtoo.
“Unsa ka importante nga kita anaa diha sa atong pagtoo ug pagsalig sa Ginoo kay Siya ang mohatag og giya, gahum nga atong ma-fulfill, atong matuman ang atong pagkaginikanan ngadto sa atong mga kaanakan,” sumala ni Rev. Macad.
Lakip sa gipasidunggan nga nakaangkon sa unang pwesto taliwala sa mga entries sa tanang mga LGUs sa probinsya mao sila Ma. Jeanel Avenido sa Tagum City isip Child Exemplary ug Sa Mata ng Batang 4Ps Awardee, ug ang mga LGU sa IGACOS, Carmen, Panabo City, ug Kapalong alang sa LCPC ug LCAT-VAWC Functionality Awards.
Dugang pa, nasungkit sa LGU IGACOS ug Santo Tomas Police Stations ang Oplan Pagkilala Award isip pag-ila sa ilang inisyatibo alang sa kalinaw ug kaluwasan sa pamilya ug komunidad.
Sa ngalan sa gobernador, si Felimon H. Amper Jr., iyang Private Secretary, nag-ingon nga kung lig-on ug mahigugmaon ang pamilya, lig-on ug malinawon usab ang katilingban.
“As we continue to move forward under the banner of Bagong Pilipinas, let us strengthen the ties that bind us as families. Let us create home that are nurturing, peaceful, and filled with respect and understanding. In building strong families, we build a stronger province, and stronger Mindanao, and ultimately a stronger nation,” ingon niya.
Dugang sa kalipay sa selebrasyon ang mga door prizes sama sa kitchen accessories, pagkaon, ug non-food items alang sa tanang pamilya nga mitambong.
Writer: Jun Rey VillanuevaPhotos: PSWDO DavNor
