Gipakusgan sa Probinsyal nga Panggamhanan sa Davao del Norte ubos sa liderato ni Governor Edwin I. Jubahib, pinaagi sa Provincial Social Welfare and Development Office (PSWDO), ang proteksyon sa kabataan panahon sa emerhensiya pinaagi sa tulo ka adlaw nga Orientation and Workshop on the Formulation of the Comprehensive Emergency Program for Children (CEPC) nga gipahigayon niadtong Oktubre 1-3 sa Cris Inn, Apokon Road, Tagum City.

Gisalmotan ang maong kalihokan sa kapin 50 ka partisipante nga naglakip sa mga social workers, kapulisan, mga representante sa city ug municipal health offices, ug sa local disaster risk reduction and management offices (LDRRMO).

Atol sa workshop, gipresentar ang lain-laing pamaagi sa paghimo og child-friendly spaces, pag-ila ug pagpanalipod sa katungod sa kabataan, ilabina sa panahon sa kalamidad ug emerhensiya.

Matod ni Davao de Oro Social Welfare Officer IV Preciosa Toledo, kinahanglan nga maprotektahan dili lamang ang mga kabataan apan apil usab ang mga kababainhan ug ang pag-atiman sa ilang maayong panglawas sulod sa mga evacuation centers.

“Ang gipahigayon sa Davao del Norte nga activity giapilan sa ila pud nagkadaiyang LGUs. Usa ‘ni siya ka adbokasiya nga ipakita nato nga kinahanglan gyud hatagan og dakong importansya ang atong mga kabataan because 60% of the affected during calamities are our children,” sulti ni Toledo.

Kauban ni Toledo sila si Social Welfare Officer III Fevelyn Marfe ug OIC Assistant PG-Head Lanny Guinit nga maoy mga mamumulong sa kalihokan. Ang workshop gihimo isip kabahin sa pagpangandam sa probinsya aron masiguro ang kahimtang ug kaayohan sa kabataan panahon sa mga kalamidad.

“Kay gikinahanglan man gyud ang ensaktong kolaborasyon ‘ani nga programa. So for this, wala man ‘ta nag-ampo but we are hoping that in any eventualities ready na ‘ta,” dugang ni Toledo.

Writer: Lorna Tripoli