Naghudyaka nga misaksi ang liboan ka mga Dabaonon sa paglusad sa pinakaunang DavNor 3D Mapping Projection Christmas Show ug Paskuhan Village sa Davao del Norte karong gabii sa adlaw’ng Domingo, Disyembre 7, 2025.
Gipangunahan ni Governor Edwin “Kuya Gob” Jubahib ug Vice Governor Clarice “Clang-Clang” Jubahib ang maong okasyon, kauban ang mga provincial officials ug department heads.
Ang Light of Hope 3D Mapping Show, nga gipasundayag atubangan sa gambalay sa Provincial Capitol, kauban ang Paskuhan Village, nagkantidad og mokabat ngadto sa P10 milyones.
Kini nahimong possible tungod sa donasyon sa mga private individuals nga dunay dakong pagsalig sa liderato ni Kuya Gov ug VG Clang-Clang.
Luyo sa mga pagsulay, kalisdanan, ug kalamidad, mapasalamaton gihapon si Kuya Gov sa atong Labaw’ng Makagagahum ug sa pagtinabangay sa katawhan aron maangkon ang daghang mga kalampusan ug kadaugan sa probinsiya sa tuig 2025.
“Bisan pa man sa tanan nga pagsulay nahimo tang madaugon tungod sa atong panahiusa… angay lang nga atong i-celebrate ang kahayag sa Pasko ug ang kahayag sa umaabot nga Bag-ong Tuig 2026, So, ang tanang natong kalisod ug ang tanan natong kalampusan nga nahimo kining tanan atong pasalamatan sa atong Guinoong Hesu Kristo,” sulti sa gobernador.
Si VG Clang-Clang mipadayag nga ang light show nagsimbolo nga kung dunay kahayag ang kasing-kasing, kaya jud kaayo nga latason ang bisan unsa mang hagit sa kinabuhi.
“Ang atong Kapitolyo semento ug lig-on. Pero kung gabii ngitngit. Apan kung atong pasigahan, kung atong butngan og color mausab ang iyang dagway. Mahimo kining buhi… nindot tan-awon. Mao sab kini ang storya sa atong kinabuhi. Adunay panahon nga ang atong kinabuhi murag semento – gahi, bug-at ug usahay ngitngit tungod sa atong problema. Pero ang Pasko ang magpahinumdum kanato nga kung pasudlon nato ang kahayag – ang kahayag sa pagtoo, kahayag sa paghigugma ug kahayag sa pagtinabangay mausab ang dagway sa atong kinabuhi,” ingon sa bise gobernadora.
Ang Christmas Light Show ug ang Paskuhan Village ipasundayag kada gabii, hangtud Enero 8, 2026.
