Sabay nga gipirmahan sa Probinsyal nga Panggamhanan sa Davao del Norte ug sa Department of Agriculture Regional Project Coordination Office XI ang Implementation Management Agreement alang sa PRDP Scale-up Subproject nga rehabilitasyon sa Daligdigon-Paiton FMR with bridge sa Talaingod.
Mismong si Governor Edwin “Kuya Gob” Jubahib ug si DA XI Regional Executive Director Macario Gonzaga ang nanguna sa pagpirma sa maong kasabotan, inubanan sa Provincial Project Management and Implementation Unit (PPMIU) karong adlawa, Disyembre 17.
Layon sa kasabutan nga masiguro nga matuman ang mga katungdanan ug responsibilidad sa mga organisasyon alang sa tukmang implementasyon sa maong proyekto.
Ang maong proyekto milatas sa mga sitio sa Barangay Dagohoy ug Palma Gil, ug adunay katas-on nga 7.70 kilometros nga dalan ug 90 metros nga tulay. Gibana-banaan nga mutangkod kini sa kapin 854 ka ektaryas nga agricultural area, kung asa dinhi pud nahimutang ug nanginabuhi ang mga mag-uuma nga Ata-Manobo ug Mandaya.
Mapasalamaton si Kuya Gob sa paghatag og katumanan sa maong proyekto. Sulti niya, pangandoy na niya ang maong proyekto sukad sa iyang unang termino tungod personal niyang nakita ang kalisod sa kaagi sa mga mag-uuma sa Talaingod.
“This project before is a dream, but now a reality. Sa akong three terms, during my first time gipangandoy na nako ni nga project… Before, pag-adto nako aning lugara sa Talaingod,I saw the situation of the IPs. It’s very hard for them to carry their harvests to the market… Maong salamat sa DA XI nga grabe ang pang-christmas nga regalo sa atong kaigsuonang IPs,” sulti ni Jubahib.
Gisiguro ni Kuya Gob nga high-standard ang mamahimong implementasyon sa maong proyekto alang sa kaayohan sa sektor sa agrikultura sa probinsiya.
“Rest assured that this project will be implemented well. Maningkamot ang provincial government of Davao del Norte nga ang agriculture sector, dili mapabayaan ug 100 percent support ang atong ihatag,” pamatuod sa gobernador.
Kahinumdiman nga gidawat na ni Kuya Gob ang No Objection Letter 1 alang sa maong proyekto gikan mismo sa DA Central Office sa Quezon City niadtong Disyembre 9 ning kasamtangang tuig.
