Puno sa kasadya ang pagsaulog sa ika-36 nga Child Development Workers/Teachers Day nga adunay temang "Mga Child Development Workers, Haligi ng Maagang Edukasyon, Gabay sa Matatag na Kinabukasan ng Kabataan," nga gipahigayon sa DavNor Gym sa DNSTC, Mankilam, Tagum City niadtong Hunyo 11.
Lakip sa mga gipasidunggan si Judy An Pareñas sa Tagum City, nga gideklarang Best Child Development Worker 2026. Gidawat niya ang P10,000 nga cash incentive isip pag-ila sa iyang talagsaong serbisyo, samtang ang ubang nominado nakadawat usab og P5,000 matag usa isip consolation prize.
Nahatagan usab og kahigayonan ang ubang magtutudlo sa pagpakita sa ilang talento pinaagi sa retro dance presentations ug rampa competition.
Dugang pa, gipasidunggan sila pinaagi sa gidawat nila nga mga sertipiko ug cash incentives alang sa ilang malungtarong serbisyo, ilabi na kadtong nakaserbisyo gikan 5, 15, 20 hangtod 30 ka tuig.
Samtang, gipadayag usab ang suporta ni Governor Edwin I. Jubahib pinaagi sa iyang representante. Mitambong usab si kanhi Board Member Nicandro Suaybaguio Jr., nga kasamtangan'g Chief of Staff sa buhatan ni Vice Governor Clarice Jubahib, isip opisyal nga representante sa bise gobernador.
Sa iyang mensahe, gipadayag ni Suaybaguio nga usa sa mga gitingoha ni Vice Gov. Jubahib ang pagpanday og balaodnon nga nagtumong sa pagpausbaw sa honorarium sa mga Child Development Workers. Gihisgutan usab niya ang nagpadayon nga mga programa alang sa edukasyon, sama sa pagpanghatag og school supplies sa mga hilit nga komunidad pinaagi sa pakigtambayayong sa Federation of Filipino Chinese Chambers of Commerce and Industry, ingon man ang Paglaum Tour alang sa mga estudyanten nga sakop sa Indigenous Peoples (IPs).
Ang maong selebrasyon nga gidumala sa Provincial Social Welfare and Development Office nahimong higayon sa pagpasidungog sa dedikasyon ug serbisyo sa mga Child Development Workers ug teachers, samtang nagpalig-on usab sa ilang papel isip haligi sa sayong edukasyon ug inspirasyon sa padayon nga pagpalambo sa kalidad sa edukasyon alang sa kabataan sa Davao del Norte.
