Nagbansay ang Probinsyal nga Panggamhanan sa Davao del Norte pinaagi sa Provincial Human Resource Management Office (PHRMO) og duha ka adlaw nga Government Writing and Information Design Training alang sa 50 ka empleyado gikan sa nagkadaiyang departamento sa Kapitolyo. Gipahigayon ang maong pagbansay sa PAGRO Training Hall, Government Center, Mankilam, Tagum City, niadtong Hunyo 16-17.

Kabahin kini sa implementasyon sa Strategic Competency-Based Human Resource Development (HRD) Plan CY 2025–2027 (Year 2) nga nagtumong sa pagpalig-on sa kahibalo ug kahanas sa mga empleyado sa pagsulat sa opisyal nga komunikasyon ug paghimo og epektibong information design.

Gipangunahan ni PHRMO Head Edwin Palero ang maong kalihokan uban sa mga resource speaker gikan sa Civil Service Commission Regional Office XI, nga sila si Special Investigator III Cherrie Amor Tag-at ug Special Investigator III Hilarion Matavia Jr. Naghatag sila og mga leksyon ug giya aron mapalambo ang kalidad sa pagsulat ug komunikasyon sa serbisyo publiko.

Pinaagi niini mas mapauswag sa mga empleyado ang ilang paghatag og episyente, propesyonal, ug responsableng serbisyo sa katawhan.