Gituki sa Provincial Development Council (PDC) Multi-Sectoral Committee ang gisugyot nga Annual Investment Plan (AIP) alang sa Calendar Year 2027 atol sa ilang tigum nga gipahigayon sa Capitol Pavilion, DNSTC, Mankilam, Tagum City niadtong Hunyo 17.
Gitambongan sa mga representante gikan sa nagkalain-laing ahensya sa gobyerno, mga civil society organizations (CSOs), lokal nga mga opisyal, ug ubang sektor ang maong panagtigom aron hisgutan ang mga prayoridad nga programa ug proyekto nga pagapondohan sa probinsya sa sunod tuig.
Atol sa tigum, gipresentar sa Provincial Planning and Development Office (PPDO) ang mga programa ug proyekto nga gikinahanglan og pondo sa nagkalain-laing departamento sa probinsya. Ang mga gipangandam nga inisyatibo nagtumong sa pagpalig-on sa mga prayoridad sa administrasyon ni Gobernador Edwin I. Jubahib, lakip ang imprastraktura, serbisyo sa panglawas, peace and order ug public safety, mga proyekto sa puy-anan, agrikultura, pangisdaan, ug uban pang mga programa sa kalamboan.
Nirepresentar sa gobernador si Provincial Administrator Atty. Ralph Dela Cruz. Sumala kaniya, gawas sa mga prayoridad nga proyekto nga gilatid sa AIP 2027, pagapangitaan usab og paagi aron mahatagan og angayang pondo ang pipila ka mga sugyot sa mga miyembro sa komitiba.
Samtang, gipasabot ni Vice Governor Clarice T. Jubahib nga nagpadayon ang administrasyon sa pagpatuman sa transparent ug responsable nga paggasto sa pondo sa gobyerno. Iyang gipasalig nga ang matag pondong igahin sa probinsya gamiton lamang sa mga lehitimong proyekto nga adunay tinuod nga kaayohan sa katawhan sa Davao del Norte.
“Daghan kaayo og isyu sa Pilipinas karon nga gitawag nila'g ghost project. Busa atong ipakita nga dili ing-ana ang Probinsya sa Davao del Norte. Moplano ta ug modeliver ta,” matod ni Vice Governor Jubahib.
Dugang pa sa bise gobernador ug ni Provincial Administrator Atty. Dela Cruz, ilang masiguro nga ang pondo nga igahin sa nagkalain-laing sektor ubos sa AIP 2027 magamit sa hustong paagi ug makaabot sa mga benepisyaryo.
“Kay kinahanglan among masiguro nga ang programang mahatagan og pondo adunay klarong tumong ug tinuod nga pulos sa katawhan,” dugang ni Vice Governor Jubahib.
Samtang, gipahayag usab ni Atty. Dela Cruz ang kahinungdanon sa transparency sa pagdumala sa pondo sa gobyerno.
“The people of Davao del Norte deserve to know how decisions are made, how resources are allocated, and how programs are implemented,” matod ni Atty. Dela Cruz.
Gilauman nga mahimong basihan sa paghimo sa badyet sa probinsya alang sa tuig 2027 ang Annual Investment Plan. Nahiuyon usab kini sa mga polisiya ug direksyon nga gilatid sa Local Development Investment Program (LDIP) 2026–2028, aron masiguro ang padayon ug organisadong pagpatuman sa mga programa ug proyekto alang sa kalamboan sa Davao del Norte.
