Gilusad sa Probinsyal nga Panggamhanan sa Davao del Norte ang dungan nga Clean-up Drive ug Operation Kulob alas-4 sa hapon niadtong Hunyo 19 isip kabahin sa pagsaulog sa Dengue Awareness Month karong bulan sa Hunyo.
Gihimo ang kalihokan palibot sa Provincial Capitol, lakip ang kasadpan ug sidlakan nga bahin niini, sugod sa Provincial Jail padulong sa Department of Labor and Employment (DOLE) XI Field Office ug gikan sa Provincial Social Welfare and Development Office (PSWDO) hangtod sa Tahanan ng Gobernador. Gihinloan usab sa mga partisipante ang mga kanal nga agianan sa tubig sa nagkalain-laing mga bilding sulod sa capitol compound.
Aktibong nagtinabangay ang mga empleyado sa pagpanghipos sa mga basura, pagkolekta sa mga plastik nga botelya, ug pagtangtang sa mga butang nga mahimong pondohan sa tubig aron mapugngan ang pagpasanay sa Aedes aegypti, ang matang sa lamok nga nagdala sa sakit nga dengue. Pipila sa mga departamento nga mipartisipar mao ang sa Provincial Engineering's Office (PEO), Provincial Agriculturist's Office (PAGRO), Legislative department, ug uban pang mga opisina.
Gipatuman ang maong kalihokan subay sa direktiba ni Governor Edwin I. Jubahib, nga nagmando sa padayon nga paghinlo sa ilang mga palibot aron malikayan ang pagkuyanap sa dengue ug mapanalipdan ang panglawas sa katawhan.
Gisugo usab sa gobernador ang Provincial Health Office sa hugot nga pagpatuman sa 5S Strategy batok sa dengue, nga naglakip sa: Search and Destroy sa mga posibleng lubloban sa lamok, Self-Protect pinaagi sa angayng pagpanalipod sa kaugalingon, Seek Consultation kun aduna’y sintomas sa dengue, Support Fogging sa mga lugar nga aduna’y outbreak, ug Sustain Hydration o pag-inom kanunay og tubig aron malikayan ang komplikasyon sa sakit.
Pinaagi niini nga inisyatiba, gipakita sa probinsya ang padayon nga paningkamot sa pagpalig-on sa kampanya batok sa dengue ug sa pagdasig sa tanang empleyado ug residente sa pagmintinar sa kalimpyo ug himoong habit ang matag 4'oclock sa kahaponon nga paghinlo alang sa usa ka luwas nga trabahoan ug komunidad.
