Giaprubahan sa Provincial Development Council (PDC) ang daghang mahinungdanong programa ug plano nga gitumong sa pagpalig-on sa sektor sa agrikultura ug pangisdaan sa Davao del Norte atol sa PDC Meeting nga gipangunahan ni Governor Edwin I. Jubahib sa Capitol Pavilion, DNSTC, gahapong adlawa, Hunyo 24, 2026.

Usa sa mga giaprubahan mao ang Collaborative Provincial Agriculture and Fisheries Extension Program (CPAFEP) nga nagtumong sa paghatag og mas episyenteng serbisyo ug suporta sa mga mag-uuma ug mangingisda pinaagi sa panaghiusa sa Provincial Government, Department of Agriculture, Bureau of Fisheries and Aquatic Resources (BFAR), Local Government Units (LGUs), State Universities and Colleges, pribadong sektor, ug uban pang partner agencies.

Pinaagi sa CPAFEP, matubag ang mga kakulangan sa produksyon ug value chain sa mga prayoridad nga produkto sa probinsya. Gilauman usab nga makatabang kini sa pagtaas sa kita sa mga mag-uuma ug mangingisda ingon man sa pagpalambo sa ilang panginabuhian.

Giaprubahan usab sa maong mitting ang Bamboo Provincial Commodity Investment Plan (PCIP) 2026-2028, nga nagtutok sa pagpalambo sa industriya sa kawayan isip alternatibong panginabuhian, negosyo, ug trabaho alang sa mga nagkadaiyang komunidad sa probinsya. Gilauman nga makatabang kini sa pagduso sa mga industriya nga nag gamit og kawayan sama sa bamboo tiles, bamboo ceiling, bamboo furnitures, ug uban pa.

Lakip usab sa nakadawat og suporta ang Updated Provincial Commodity Investment Plan, nga nagsilbing giya sa mga programa ug pamuhunan sa agrikultura sa probinsya gikan sa 2026 hangtod 2028. Ang plano nagtutok sa mga prayoridad nga produkto sama sa cacao, humay, mais, lubi, goma, mangga, abaka, ug kape aron mapalambo ang produksyon sa merkado, ug mapadako ang kita sa mga mag-uuma ug mga negosyante.

Ang mga proyekto pagabasehan sa aktuwal nga panginahanglan sa matag commodity value chain aron masiguro nga epektibo ang paggamit sa pondo ug mas mapalig-on ang agribusiness sector sa Davao del Norte.