Gipasidunggan sa Department of Environment and Natural Resources (DENR)-XI si Governor Edwin “Kuya Gob” Jubahib tungod sa iyang mga programa nga nakahimo og dakong epekto sa pagsulong sa konserbasyon ug maluntarong kalamboan.
Usa si Kuya Gob sa gihatagan sa Plake sa Pagpasalamat nga alang ngadto sa mga stakeholders ug partners nga barug nga nakighiusa sa programang konserbasyon sa gobyerno, sa gipahigayon nga 2026 Araw ng Pagpupugay karong adlawa.
Gipangunahan ni DENR-XI Regional Director Atty. Ma. Mercedes Dumagan ang maong okasyon, isip parte sa kulminasyon sa kasaulogan sa Environment Month, nga naghatag pasidungog ngadto sa mga ahensiya ug indibidwal nga nagpakita sa ilang dedikasuyon sa pagpanalipud sa kinaiyahan.
Partikular nga gisambit ang inisyatibo sa gobernador sa pagpanalipud sa Pantaron Mountain Range (PMR), ang nahibiling kalasangan ug ulohan sa mga dagkong suba sa Davao Region, Northern Mindanao Region, ug sa Caraga Region.
Ang dakong parte ug bagang kalasangan sa PMR, nga dunay 1,600 ka hektarya, nahimutang sa probinsiya sa Davao del Norte ug ang pagkadaot niini gikahadlokan nga maghatag og dakong katalagman sa probinsiya.
Gisugdan sa probinsiya ang pagpahiuli sa 150-hektarya sa PMR pinaagi sa pagtanum sa liboan ka mga seedling sa mga kahoy, pagtanum sa 150,000 ka seedling sa lubi, ug pagpakatap sa 69 ka mga Bantay Gubat forest guard.
Lakip usab sa mga kalampusan sa probinsiya ang pagpananum sa dul-an 700,000 ka mga forest and fruit tree seedlings sa dul-an 3,000 hektarya sa Davao del Norte sulod sa pito ka tuig.
Gipakusog sab sa gobernador ang programa sa solid waste management, diin nadawat niya ang Excellence Leadership Award sa pagmugna sa clustered shared disposal facilities sa mga lungsod.
Sulti ni Kuya Gob nga nag-agad ang kalampusan sa iyang programa sa tabang sa ubang mga ahensiya, LGUs, ug mga komunidad.
“It is the unwavering commitment of our partners and stakeholders that enabled us to turn ambitious goals into measurable, lasting impact… (It) showed the power of synergy in saving our ecosystem. We worked together not just to protect nature. It is a movement in securing our own future,” sulti niya.
“We have honored a collective commitment to service excellence and shared governance in the pursuit of a sustainable and harmonious environment… we extend our deepest appreciation to our stakeholders and partners who stood shoulder-to-shoulder with us in this noble endeavor,” sulti ni Director Dumagan, sa iyang mensahe pasalamat.
