Giduso ang mga resolusyon sa Provincial Disaster Risk Reduction and Management Council (PDRRMC) ngadto sa Sangguniang Panlalawigan alang sa saktong proseso ug pag aproba, may kalabotan sa paghangyo og awtoridad gikan sa Office of the President aron magamit ang P3 milyon nga donasyon alang sa mga biktima sa bagyong Basyang isip dugang tabang sa mga pamilyang naapektuhan sa pagbaha nga gidala sa shear line niadtong Pebrero 2026. Lakip sab niini ang gisugyot sa konseho nga pagbakwi sa SP Resolution No. 938 nga nagdeklara sa Probinsya sa Davao del Norte ubos sa state of calamity tungod sa kadaot nga nahatag sa doublet earthquake niadtong Oktubre 10, 2025. Kini ang nanag-unang gihisgutan atol sa CY 2026 Second Quarter PDRRM Council Meeting nga gipahigayon sa Pavilion, Davao del Norte Sports and Tourism Complex (DNSTC) sa Mankilam, Tagum City niadtong Hunyo 25.
Gipresentar usab sa PDRRMC ang mga programa ug estratehiya sa Disaster Prevention and Mitigation nga nagtumong sa pagpalig-on sa kahandam ug kapasidad sa lalawigan batok sa mga hulga sa kalamidad.
Subay usab kini sa pahimangno ni Engr. Araya Mahilum gikan sa DOST-PAGASA ang posibilidad sa pag-abot sa usa ka super El Niño sa katapusang kwarter sa tuig 2026. Sumala sa PAGASA ENSO Alert System, adunay 69 porsiyentong posibilidad nga masinati sa probinsya ang hulaw sa mga bulan sa Oktubre, Nobyembre, ug Disyembre 2026, ug Enero 2027.
Si Gobernador Edwin I. Jubahib, pinaagi sa iyang representante nga si Provincial Administrator Atty. Ralph Dela Cruz, maoy nangulo sa maong konseho. Nitambong usab ang mga pangulo sa nagkalain-laing departamento sa kapitolyo, lakip si PDRRMO Head Glenda Delideli, ug kauban ang mga representante gikan sa mga non-government organizations, stakeholders, mga ahensya sa gobyerno, Philippine National Police (PNP), Armed Forces of the Philippines (AFP), ug uban pang mga sektor.
Pinaagi sa padayon nga koordinasyon ug pagplano, gipakita sa PDRRMC ang lig-on nga paningkamot sa pagpalambo sa disaster resilience ug pagtabang sa komunidad panahon sa amerhensiya.
