Gipalig-on karon sa probinsiya sa Davao del Norte ang nagkadako nga papel niini isip ganghaan sa Association of Southeast Asian Nations (Asean), labi na sa natad sa patigayon, pamuhunan ug regional connectivity, kon, pagkadugtong sa rehiyon.
Sa iyahang ika-7 nga State of the Province Address, gipasigarbo ni Governor Edwin “Kuya Gob” Jubahib ang daghang mga kalampusan sa probinsiya, lakip na ang pinakataas nga parte sa pamuhunan, pinakaubos nga inflation rate, pinakaubos nga incidente sa kapobrehon, Most Competitive Province ug Most Business-Friendly Province sa Davao Region.
Dugang niya nga ang panag-abin niini sa ubang nasud, labi na sa Malaysia nagpakusog sa bentaha niini sa kompetisyon ug nagpalapad sa koneksiyon sa lokal nga merkado ngadto sa tibuok kalibutan, labi na sa Asean.
“Davao del Norte is ever open for business…. the world is ours for the taking and we now have the full confidence to conquer challenges inside and beyond our borders,” sulti ni Kuya Gob.
Kini nga lakang sa probinsiya suportado kaayo ni Mindanao Development Authority (MinDA) chairperson Secretary Leo Tereso A. Magno, diin iyang giila ang maluntarong kalinaw, nag-usbaw nga ekonomiya, ug estratehikong imprastruktura naghimo sa Davao del Norte isip usa ka mahinungdanong sentro sa pag-uswag sa Mindanao.
"As Mindanao advances the Gateway Corridor Initiative, Davao del Norte stands as a vital hub connecting our communities directly to regional markets," sulti ni Magno.
Gihatagan og gibug-aton ni Magno nga ang pag-apil sa SOPA ni Kuya Gob sa prinsipe sa Malaysia sa nga si His Highness Tengku Putra, gikan sa Selangor and Kelantan royal families, nagpaila sa nagkalig-on nga relasyon tali sa Mindanao ug sa Malaysia, pinaagi sa Brunei Darussalam-Indonesia-Malaysia-Philippines East Asean Growth Area (BIMP-Eaga).
Misaad ang opisyal sa iyang bug-os nga suporta ug sa tabang sa MinDa aron makab-ot sa gobernador ang iyang mga tumong ug tinguha alang sa katawhang Dabaonon.
“Ang kinabukasan ng Davao del Norte ay kinabukasan ng buong Mindanao,” maoy panapos niya.
Ang SOPA sa gobernador mao ang pinakamaayong bahin sa selebrasyon sa 59th Araw ng Davao del Norte, nga dunay tema nga: "DavNor@59: Building a Legacy Beyond Borders."
