Malampusong nakakompleto sa ilang tagsa-tagsa ka technical-vocational programs ang 119 ka trainees sa DavNor Tech Voc Center atol sa Ikaduhang Commencement Exercises nga gipahigayon karung adlawa, Hulyo 8, 2026 sa Bulwagan ng Karunungan, Provincial Government Center, Tagum City.
Ang mga completers naglangkob sa 20 ka trainees sa Housekeeping NC II, 25 trainees sa Heavy Equipment Operation (Wheel Loader) NC II, 11 trainees sa Heavy Equipment Operation (Hydraulic Excavator) NC II, 10 trainees sa Small Engine Servicing NC II, 4 trainees sa Automotive Servicing NC II, 20 trainees sa Forklift Operation, 10 trainees sa Masonry Works, ug 20 trainees sa Shielded Metal Arc Welding (SMAW).
Sa iyang welcome remarks, gipasiugda ni Provincial Administrator Ralph P. Dela Cruz ang bili sa edukasyon ug pagpaningkamot isip susi sa kalampusan. Gihisgutan usab niya ang inspirasyonal nga kaagi ni Gov. Edwin I. Jubahib, kinsa nakakuha og dakong oportunidad pinaagi sa TESDA scholarship, isip pamatuod nga ang determinasyon, dedikasyon, ug kakugi mahimong magdala sa usa ka tawo ngadto sa kalampusan.
Sa mensahe ni Governor Edwin I. Jubahib, isip keynote speaker nga gi representa ni Pastor Rene Boy Enguito, iyang gituki nga ang pagpaningkamot dili lang sukdanan kung asa taman ang nahuman kundi ang determinasyon nga makakat-on, ang kahanas nga makuha ang ilang pangandoy, ug mahimong kabahin sa padayon nga kalamboan sa Davao del Norte.
Mihatag sab og mensahe isip pasalamat ang usa sa mga trainees nga si Francis James Cuerring ug si Richard Soria gikan sa Provincial Engineer's Office.
Ang maong seremonya nagpamatuod sa padayon nga paningkamot sa Probinsyal nga Panggamhanan sa Davao del Norte sa pagpalig-on sa technical-vocational education.
