Gipangunahan ni Governor Edwin "Kuya Gob" Jubahib ug Vice Governor Clarice Jubahib ang paghatod sa nagkadaiyang libreng serbisyo sa Kapitolyo ngadto sa mga lumulupyo sa Barangay Ising ug mga clustered barangay sa Carmen pinaagi sa Oplan Kaagapay sa Kalinaw ug Kalamboan (KKK).

"Gihimo na nato kini nga programa sukad pa sa akong pagka-Gobernador aron ang gobyerno mismo ang moadto sa inyong tugkaran ug mohatag og tinuod nga serbisyo," ingon ni Kuya Gob.

Ikatulo na kini nga hugna sa Oplan KKK sa lungsod sa Carmen, isip kabahin sa padayon nga pagpalapad sa programa ngadto sa tanang barangay sa probinsya sa Davao del Norte.

Gipahimuslan sa mga lumulupyo ang nagkadaiyang libreng serbisyo lakip ang medical ug dental consultation, eye check-up, libreng tambal, pagpahimo og birth certificate, tuli, gupit, CPR ug First Aid demonstration, legal ug notarial services, pagpanghatag og Grab Kits, IEC materials, school bags, tsinelas, bugas, binhi sa gulay ug prutas, abono, ug uban pang ayuda.

Atol sa programa, gidayeg ni Governor Jubahib si Vice Governor Clarice Jubahib tungod sa iyang pagkaaktibo sa pag-alagad ug paghatag og prayoridad sa kaayohan sa katawhan bisan pa sa iyang kabatan-on. Matud niya, ang tinuod nga pagpanerbisyo nagkinahanglan og gugma ug kasingkasing alang sa katawhan.

"Ang pagpanerbisyo nagkinahanglan og kasingkasing ug tinuod nga paghigugma sa katawhan nga maoy nagbutang kanato sa pwesto," dugang ni Governor Jubahib.

Sa mensahe usab ni Vice Governor Clarice Jubahib, iyang gipahinumdoman ang mga nanginahanglan og tabang sa hospital bills nga mahimong moduol sa iyang opisina aron makapangayo og medical assistance gikan sa pondo nga gitugyan sa nagkalainlaing mga senador alang sa mga Dabaonon.

"Ania kami karon dili aron kami ang inyong pasalamatan, kondili aron mohatud og serbisyo alang sa inyong kaayohan. Sa mga nanginahanglan og tabang sa hospital bills, ayaw mo og kaulaw pagduol sa akong opisina kay adunay pondo nga gitugyan sa mga senador alang sa katawhan sa Davao del Norte," sulti ni VG Clarice.

Samtang, gipasalig ni Carmen Mayor Leony Bahague ang padayon niyang suporta sa Oplan KKK, nga iyang gihulagway nga usa ka dakong tabang sa katawhan tungod kay ang mga serbisyo sa gobyerno gidala na mismo ngadto sa mga barangay, nga nakapadali sa pag-abot sa batakang serbisyo alang sa mga residente.