Dako ang kalipay ug pagpasalamat sa mga lumulupyo sa Barangay Tuganay ug mga clustered barangay sa Carmen human mapahimuslan ang nagkadaiyang libreng serbisyo nga gidala sa Probinsyal nga Panggamhanan sa Davao del Norte pinaagi sa Oplan Kaagapay sa Kalinaw ug Kalamboan (KKK), nga gipangunahan ni Governor Edwin "Kuya Gob" Jubahib ug Vice Governor Clarice Jubahib.

Dako ang nahupayan sa mga pamilya ilabina sa mga ginikanan nga nakadawat ang ilang mga anak og school bags ug tsinelas, samtang daghan usab ang nakabenepisyo sa libreng medical ug dental consultation, tambal, eye check-up, birth certificate processing, legal services, bugas, binhi, abono, ug uban pang serbisyong direktang mitubag sa ilang panginahanglan.

Matud ni Governor Jubahib, gipadayon ang Oplan KKK aron ang serbisyo sa gobyerno maabot ang katawhan sa ilang komunidad.

"Among gidala ang serbisyo sa inyong barangay aron mas sayon ug mas duol kini sa katawhan," ingun ni Kuya Gob.

Samtang, gipahinumdoman ni Vice Governor Clarice Jubahib ang mga nanginahanglan og tabang sa hospital bills nga mahimong moduol sa iyang opisina aron makapangayo og medical assistance.

"Ania kami aron moalagad ug motabang sa matag Dabaonon nga nanginahanglan. Sa kadtong nanginahanglan og hospital bill assistance, ayaw mo kaulaw og adto sa akong opisina tungod kay adunay pondo nga gihatag sa nagkadaiyang senador sa akong opisina aron itabang kaninyo," sulti ni Vice Governor Clarice Jubahib.

Ang maong kalihokan mao na ang upat nga hugna sa Oplan KKK sa lungsod sa Carmen isip kabahin sa padayon nga pagpalapad sa programa sa nagkadaiyang komunidad sa Davao del Norte.