Pasado ang Provincial Government of Davao del Norte ug 10 ka local government unit (LGUs) sa probinsya sa 2025 Good Financial Housekeeping (GFH) assessment nga gipahigayon sa Department of the Interior and Local Government (DILG).

Kini nagpasabot sa lig-on nga pagpatuman sa tin-aw, may tulubagon, ug maayong pagdumala sa pondo sa gobyerno.

Aron makapasar sa GFH, gikinahanglan nga ang lokal nga kagamhanan makadawat og Unmodified o Qualified Audit Opinion gikan sa Commission on Audit (COA), nga nagpasabot nga ang ilang financial records husto ug walay bahid nga paglustay sa kwarta sa gobyerno.

Kinahanglan usab nga matuman ang Full Disclosure Policy (FDP) sa mga financial documents sa FDP Portal. Usa kini ka polisiya sa gobyerno nga nagpatuman sa mga opisyal sa lokal nga panggamhanan sama sa probinsya, syudad, lungsod, ug barangay nga ipadayag sa publiko ang ilang mga pinansyal nga transaksyon.

Base sa memorandum nga gipirmahan ni DILG Secretary Juanito Victor Remulla, nakab-ot sa probinsya ang minimum requirements alang sa GFH pinaagi sa tukmang accounting practices ug pagsunod sa mga polisiya sa financial management.

Apil ang probinsya ug ang LGUs niini sa 1,604 ka local government units sa tibuok nasod ang nakapasar sa assessment gikan sa 1,716 ka LGUs nga gi-evaluate. Lakip niini ang 77 ka probinsya, 145 ka siyudad, ug 1,382 ka mga lungsod.

Ang maong pag-ila usa ka timaan sa padayon nga paningkamot sa probinsyal ug mga lokal nga panggamhanan aron mahimong responsable, episyente, ug transparent ang paggamit sa pondo sa katawhan.