Dako nga pagtagad sa sektor sa agrikultura ang gidala ni Governor Edwin “Kuya Gob” Jubahib human niya giawhag ang mga lumulopyo sa Barangay Magwawa nga seryosohon ang pagtanom og saging nga Cardava (saba) tungod sa taas nga demand niini sa merkado karon.

Kini ang nahimong highlight sa gipahigayong Oplan KKK kon Kaagapay sa Kalinaw ug Kalamboan sa maong barangay, diin gipasabot ni Kuya Gob nga dako og tabang ang maong tanom aron mapalambo ang ekonomiya sa pamilya sa matag mag-uuma.

“𝘋𝘪𝘯𝘩𝘪 𝘴𝘢 𝘔𝘢𝘨𝘸𝘢𝘸𝘢 𝘰𝘨 𝘶𝘣𝘢𝘯 𝘱𝘢𝘯𝘨 𝘭𝘶𝘨𝘢𝘳 𝘯𝘨𝘢 𝘥𝘶𝘰𝘭 𝘥𝘪𝘳𝘪, 𝘬𝘪𝘯𝘢𝘩𝘢𝘯𝘨𝘭𝘢𝘯 𝘮𝘢𝘯𝘢𝘯𝘰𝘮 𝘮𝘰 𝘰𝘨 𝘴𝘢𝘨𝘪𝘯𝘨 𝘤𝘢𝘳𝘥𝘢𝘷𝘢 𝘬𝘢𝘳𝘰𝘯. 𝘈𝘯𝘨 𝘪𝘯𝘺𝘰𝘯𝘨 𝘺𝘶𝘵𝘢, 𝘢𝘺𝘢𝘸 𝘴𝘢𝘺𝘢𝘯𝘨𝘢… 𝘱𝘢𝘨 𝘪𝘯𝘵𝘦𝘳-𝘤𝘳𝘰𝘱𝘱𝘪𝘯𝘨 𝘮𝘰 𝘰𝘨 𝘴𝘢𝘨𝘪𝘯𝘨 𝘤𝘢𝘳𝘥𝘢𝘷𝘢... 𝘔𝘢𝘯𝘨𝘩𝘢𝘵𝘢𝘨 𝘵𝘢 𝘰𝘨 𝘴𝘦𝘮𝘪𝘭𝘺𝘢 𝘯𝘨𝘢 𝘴𝘢𝘨𝘪𝘯𝘨 𝘤𝘢𝘳𝘥𝘢𝘷𝘢 𝘴𝘢 𝘮𝘢𝘵𝘢𝘨 𝘣𝘢𝘳𝘢𝘯𝘨𝘢𝘺,” matod pa ni Kuya Gob.

Dungan niini, gatusan ka mga Dabaonon sa Brgy. Magwawa ang malipayong nakapahimulos sa nagkadaiyang libreng serbisyo nga gidala diretso sa ilang tugkaran.

Mismo sila si Governor Edwin “Kuya Gob” Jubahib ug Vice Governor Clarice Jubahib ang nanguna sa pagbisita aron abi-abihon ug idalit ang mga serbisyong medikal ug sosyal. Lakip sa mga libreng serbisyo nga gipahigayon mao ang medical ug dental services, HIV screening ug PhilHealth Registration, libreng gupit, tambag legal, pagpa-notaryo sa mga dokumento, bugas, ug uban pa.

Gawas niini, nakadawat usab ang mga residente og mga libreng vegetable seeds, abono, ug dugang emergency grab kits. Aron mapalambo ang ilang panginabuhian, gihatagan usab ang katawhan og higayon nga makakat-on pinaagi sa livelihood training ug business consultation.

Sa iyang mensahe, gipaklaro ni Vice Governor Clarice Jubahib ang tumong sa maong programa.

“𝘕𝘢𝘯𝘪𝘯𝘨𝘬𝘢𝘮𝘰𝘵 𝘬𝘢𝘮𝘪 𝘯𝘨𝘢 𝘮𝘰𝘣𝘢𝘣𝘢 𝘮𝘢𝘵𝘢𝘨 𝘣𝘢𝘳𝘢𝘯𝘨𝘢𝘺 𝘱𝘢𝘳𝘢 𝘮𝘢𝘩𝘢𝘵𝘰𝘥 𝘢𝘯𝘨 𝘮𝘨𝘢 𝘴𝘦𝘳𝘣𝘪𝘴𝘺𝘰 𝘯𝘨𝘢 𝘱𝘢𝘳𝘢 𝘬𝘢𝘯𝘪𝘯𝘺𝘰. 𝘚𝘰, 𝘢𝘬𝘰𝘯𝘨 𝘩𝘢𝘯𝘨𝘺𝘰 𝘬𝘢𝘯𝘪𝘯𝘺𝘰, 𝘢𝘺𝘢𝘸 𝘮𝘰 𝘬𝘢𝘶𝘭𝘢𝘸. 𝘛𝘶𝘺𝘶𝘬𝘢 𝘯𝘪𝘯𝘺𝘰 𝘵𝘢𝘯𝘢𝘯 𝘴𝘦𝘳𝘣𝘪𝘴𝘺𝘰 𝘯𝘨𝘢 𝘯𝘢𝘢 𝘥𝘪𝘳𝘪𝘢 𝘬𝘢𝘳𝘰𝘯𝘨 𝘣𝘶𝘯𝘵𝘢𝘨𝘢 𝘬𝘢𝘺 𝘭𝘪𝘣𝘳𝘦 𝘮𝘢𝘯 𝘯𝘪 𝘶𝘨 𝘱𝘢𝘳𝘢 ‘𝘯𝘪 𝘴𝘢 𝘪𝘯𝘺𝘰𝘯𝘨 𝘬𝘢𝘢𝘺𝘰𝘩𝘢𝘯,” sulti ni VG Clarice, kinsa mi-awhag usab sa publiko nga dili maulaw sa pagduol sa ilang opisina kon aduna silay panginahanglanon.

Pinaagi sa hiniusang paningkamot sa pagpanghatag og libreng serbisyo ubos sa Oplan KKK, gilauman nga matabangan ang mga residente sa Brgy. Magwawa, Santo Tomas ug masiguro ang malungtarong kalamboan ug kalinaw sa komunidad.