Nakadawat og dugang puhonan nga nagkantidad og ₱10,000 matag usa ang baynte tres (23) ka mga gagmayng negosyante pinaagi sa DOLE Integrated Livelihood Program (DILP), Hulyo 16.

Ang maong mga benepisyaryo, nga kasagaran nagapaninda sulod sa Provincial Capitol Compound, opisyal nga gihatagan sa tabang-pinansyal human nakapasar sa mabinantayong assessment nga gipahigayon sa Department of Labor and Employment (DOLE) - Davao del Norte ug sa Public Employment Service Office-Davao del Norte (PESO DavNor).

Pormal nga gipili ang mga indibidwal isip ikaduhang batch nga makapahimulos sa programa nga nagtumong sa pagpalig-on ug pagpalambo sa ilang inadlaw-adlaw nga panginabuhian.

Mitambong ug personal nga misaksi sa maong programa si Vice Governor Clarice Jubahib, kauban ang mga personahe gikan sa DOLE-Davao del Norte ug PESO DavNor.

Sa iyang mensahe, gipaabot ni VG Clarice ang iyang dakong paglaom nga ang maong ayuda magsilbing kaabag ug dako og matabang aron matubag ang adlaw-adlaw nga panginahanglanon sa pamilya sa mga gagmayng negosyante.