Gipangunahan mismo ni Governor Edwin “Kuya Gob” Jubahib ang paghatud karong adlawa sa P2.5 million nga ayuda gikan sa Davao del Norte alang sa mga biktima sa kalamidad sa General Santos City ug probinsiya sa Davao Occidental.
Milangkob kini sa P1 million assistance para sa DavOcc nga gidawat ni FABC President Bianca Bautista, P500,000 alang sa lungsod sa Jose Abad Santos (JAS) nga gidawat ni Mayor Atty. Jason John Joyce, P500,000 para sa lungsod sa Sarangani nga gidawat ni Mayor Adelan De Arce, samtang P500,000 sab alang sa General Santos City nga gidawat ni Mayor Lorelie Pacquiao.
Kauban ni Kuya Gob ang mga department heads sa Kapitolyo, sa panguna ni Provincial Administrator Atty. Ralph Dela Cruz.
Ingon si Kuya Gob nga ang paghatud sa hinabang parte sa iyang obligasyon isip Chairperson sa Regional Development Council (RDC)-XI.
"Giisip nato ang Region XI nga usa ka pamilya sa Davao del Norte ug isip usa ka Chairperson sa RDC XI, obligasyon sab nako nga mohatag og support sa mga LGUs nga under sa akoang area of responsibility,” sulti sa gobernador.
Mapasalamaton si Mayor Joyce sa dakong pagtagad ni Kuya Gob sa lungsod sa JAS, diin hilabihang naigo sa 7.8 nga linog sa niaging bulan nga nasundan pa jud sa grabeng pagbaha tungod sa Bagyong Inday.
Saysay niya nga sa unang semana pa lang sa panghitabo sa linog, nagpadala na og heavy equipment ug rubber boats ang probinsiya sa Davao del Norte aron pagtabang sa search and rescue operation, diin gisundan pa kini sa usa ka truck sa mga bottled water.
“Sa week one pa lang, isa sa pinaka-unang probinsiya na tumulong at nag-responde sa amin ang province of Davao del Norte… tumulong sa mga personahe, sa mga search and rescue efforts, and even repairing of roads. And now we are already on day 40 and andiyan pa rin ang province of Davao del Norte. I would really thank the people of Davao del Norte,” sulti ni Joyce.
Gipaabot sab ni Provincial DILG Director Atty. Djamyla Caballero ang pasalamat sa katawhan sa Davao Occidental.
“From the province of Davao Occidental, on behalf of Governor Franklin Bautista and Vice Governor Lorna Bautista-Bandigan, nagpasalamat mi sa katawhan ug mga lideres sa probinsiya sa Davao del Norte…. katulo na sila nagbalik-balik para makahatud og tabang ug dili namo malimtan hangtud karon niabot na pud si governor diri para mohatud og tabang…. Nagpasalamat mi sa inyong pag-unong ug pagpakita nga tinud-anay jud nga kapamilya ug igsoon namo ang mga taga-Davao del Norte,” ingon niya.
Sulti ni Mayor Pacquiao nga gipakita gayud ni Kuya Gov ang iyang kasingkasing para sa tawo kay iyang personal nga gihatud ang hinabang para sa katawhan sa GenSan nga naigo da kusog nga linog.
“Pasalamat mi sa Ginoo kay tungod bisan luyo man sa amuang naagian nakita namo unsa ka daghan na mga tawo ang nagtabang sa amua, nga nagpangga sa taga-General Santos. Labi na karon sa presensya sa atuang Governor Kuya Gob Jubahib. Nalipay kaayo mi na makita kung giunsa niya ka pinangga ang taga-General Santos. Imagine sa kalayo nianhi jud siya diri para personal na ipaabot ang hinabang sa katawhan sa ilang lugar. Dako kaayo ning tabang nga makatabang pud sa amua, ilabina na sa mga katawhan nga naghinay-hinay pami og bangon. Nakita namo nga ang malakasakit ni Kuya Gob, naa gyud ang iyahang kasing-kasing para sa tao... bisan unsa ka layo kung pagtabang ang hisgutan, walay boundary basta pagpaabot sa tininuod nga tabang,” sulti niya.
