Napuno sa kasadya ang DavNor Gym atol sa pagsaulog sa 48th National Disability Rights Week, diin gipasundayag sa mga Persons with Disabilities (PWDs) ang ilang talento, kahanas, ug pagkamamugnaon.

Kabahin sa kalihokan ang booth display competition nga giapilan sa nagkadaiyang siyudad ug munisipyo sa Davao del Norte, pagsul-ob sa Filipino traditional attire sa mga PWD, ug folk dance competition nga nagpakita sa ilang abilidad ug determinasyon.

Gipahigayon usab ang official turnover sa mga wheelchair ngadto sa nagkadaiyang lokal nga panggamhanan (LGUs) aron mas mapalapdan ang suporta ug serbisyo alang sa mga PWD sa matag lungsod ug siyudad.

Sa mensahe ni Governor Edwin "Kuya Gob" Jubahib nga gipaabot ni Rey Cyril Alba, iyang gipasiugda nga ang maong selebrasyon nagtinguha sa pagpalig-on sa pagpanalipod sa katungod sa mga PWD.

"Kini nga selebrasyon dili lamang usa ka kasaulogan, kundili usa usab ka pamatuod nga ang matag usa, adunay lugar, katungod, ug bili sa komunidad," Ingun ni Kuya Gob

Samtang, gipasiugda usab ni Vice Governor Clarice Jubahib ang kamahinungdanon sa paghatag og patas nga oportunidad ug pag-ila sa katungod sa mga Persons with Disabilities (PWDs).

"Karong aldawa, wala lang kita naghatag og pag ila sa atoang nga PWDs nagpadayag kita og mensahe nga ang mga Dabaonon, bisag unsa pa ang kahimtang, adunay katungod nga madungog ug mahatagan og oportunidad," sulti ni VG Clarice

Ang maong kalihokan usa ka inisyatiba sa Provincial Government of Davao del Norte ubos sa pagpanguna ni Governor Edwin "Kuya Gov" Jubahib, pinaagi sa Provincial Social Welfare and Development Office (PSWDO) subay sa Proclamation No. 597, s. 2024.