Gidasig ni House of Musa Founder Gleizl Joy Soo ang mga gagmayng negosyante nga magpadayon sa ilang paningkamot bisan pa sa mga pagsulay ug kapakyasan nga ilang masinati sa pagdumala sa negosyo.
Si Soo nahimong pinasidunggang mamumulong atol sa gipahigayong MSME Development Week 2026 sa Gaisano Mall Atrium, Magugpo East, Tagum City, niadtong Hulyo 15 hangtod 19, diin iyang gipaambit ang iyang kasinatian sa pagtukod ug pagpalambo sa House of Musa.
Gisugdan ni Soo ang iyang negosyo sa paghimo og mga fabric product gikan sa saging, nga sa ulahi nakadawat og pag-ila sa nagkadaiyang nasod tungod sa kalidad ug kabag-ohan sa mga produkto niini.
Matod ni Soo, dili malikayan ang mga hagit ug kapakyasan sa pagnegosyo, apan ang determinasyon sa pagbangon ug pagpadayon maoy makatabang sa usa ka negosyante aron makab-ot ang kalampusan.
“Today's kick off our MSME Week I would like to encourage my fellow entrepreneurs to just hold on. Our progress and sustainability not only depend on our hard work but, most of all, on the One who gives us this provision. Always remember that God is in control,” sulti ni Soo.
Atol sa pag-abli sa kalihokan, gipakita usab ni Soo sa entablado ang iyang mga modelo nga nagsul-ob sa mga produkto sa House of Musa. Lakip ang mga produktong lokal nga gidisplay sa Gaisano Mall Atrium nga gidala sa nagkadaiyang local government units (LGUs) ug pribadong stakeholders.
Gipangunahan sa Department of Trade and Industry (DTI) Davao del Norte Field Office ug sa Chamber of Commerce and Industry, Inc. ang kalihokan ubos sa tema nga “Paglambo ug Paglahutay: DavNor MSMEs Magmalig-on sa Kanunay.”
Tumong sa kalihokan nga mapalig-on ang suporta alang sa mga lokal nga micro, small, ug medium enterprises (MSMEs) ug mapalapad ang ilang mga oportunidad sa digital market.
Dungan usab nga gilunsad ang “Produkto DavNor, Ato Ni Buy! Trade Expo 2026,” nga nagpasundayag sa nagkadaiyang lokal nga produkto gikan sa mga lungsod sa probinsya.
Milungtad sulod sa lima ka adlaw ang kalihokan diin naghiusa ang mga LGU, stakeholders, ug lokal nga mga negosyante aron ipakita ang kalamboan sa sektor sa MSME isip usa sa mga haligi sa ekonomiya sa Davao del Norte.
Writer: Lorna TripoliPhoto: Andrew Hababag
