Gipresentar sa Philippine Statistics Authority o PSA ang resulta sa 2024 Community-Based Monitoring System o CBMS alang sa probinsya sa Davao del Norte, diin gihatagan og gibug-aton ang paggamit sa datos isip basihan sa pag-ila ug pag-prayoridad sa mga panginahanglan sa matag komunidad sa probinsya.
Kabahin sa kalihokan ang seremonyal nga pagpirma sa Data Sharing Agreement tali sa PSA ug sa Probinsyal nga Pangagamhanan, diin mipirma niini si PSA OIC Regional Director Baby Jean Alid ug Governor Edwin “Kuya Gob” Jubahib.
Ingun ni PSA OIC Rrgional Director Alid, nakita sa mga resulta sa CBMS ang pipila ka mga panginahanglan sa mga komunidad, sama sa mga isyu sa suplay sa kuryente ug uban pang serbisyo.
Apan, gipakita usab sa datos nga ubay-ubay na ang mga komunidad nga nakab-ot ang kalamboan.
Nagpasalamat si Governor Edwin I. Jubahib sa PSA tungod kay pinaagi sa maong datos, mas matabangan ang probinsya sa pag-ila sa mga lugar nga nagkinahanglan pa og tukmang mga programa ug proyekto.
Daghan na sa mga hilit ug lagyo nga dapit sa probinsya ang naabot sa mga batakang serbisyo pinaagi sa mga programang pangkaayohan sa administrasyong Jubahib-Jubahib. Apan tungod sa kadako sa teritoryo sa Davao del Norte, aduna gihapoy pipila ka mga lugar nga lisod maabot ug ma-ila ilang mga panginahanglan.
Pinaagi sa datos gikan sa PSA, mas mailhan sa probinsya ang mga lugar nga nagkinahanglan pa og pagtagad ug mga programa nga motubag sa tinuod nga panginahanglan sa katawhan, ilabina sa tumong sa probinsya nga mahimong investment hub.
Makatabang usab ang CBMS data sa pagtan-aw sa nagkadaiyang indicators sa probinsya, nga mahimong usa sa mga basihan sa mga investors sa ilang desisyon sa pagpamuhunan.
Samtang, matud ni Provincial Planning and Development Coordinator Hazel Zafra, dako ang ikatabang sa CBMS sa paghimo sa mga plano ug polisiya sa probinsya.
Lakip niini ang paggamit sa datos sa pag-andam sa Provincial Development and Physical Framework Plan o PDPFP, nga giila isip mother of all plans, ingon man sa pag-integrate niini sa geographic information systems.
Gilauman usab sa PSA ang padayong pakigtambayayong sa mga lokal nga pangagamhanan alang sa sunod nga CBMS data collection sa 2027.
