Gibansay pag-usab ang mga local assessors, barangay officials, ug barangay functionaries gikan sa nagkadaiyang munisipyo sa probinsiya sa Davao del Norte atol sa gipahigayong One-day Information Education Campaign (IEC) on Real Property Tax Administration, subay sa implementasyon sa Republic Act 12001 o ang Real Property Valuation and Assessment Reform Act (RPVARA).

Matod ni Provincial Assessor Engr. Lily Salazar, tumong sa maong panagtapok nga palalumon ang kaalam sa mga partisipante ug mapakusgan pa ang pagpataas sa lokal nga pundo, nga mao ang pangunang susi aron mapatuman ang mga programa ug proyekto sa tagsa-tagsa ka barangay.

Atol sa maong barangay forum, gihatagan og higayon ang mga partisipante sa pagsibya ug pagpatin-aw sa ilang mga pangutana ug mga kabalaka bahin sa hustong pagkolekta og buhis nga nahisubay sa probisyon sa maong balaod.

Ang maong inisyatiba gipasiugdahan sa Provincial Assessor's Office (PASSO) uban sa pakigtambayayong sa North Davao Assessors League Inc. (NDLI), Provincial Treasurer's Office (PTO), ug Provincial Legal Office (PLO), ubos sa padayon nga suporta ug liderato ni Governor Edwin "Kuya Gov" Jubahib ug Vice Governor Clarice Jubahib.

Anaa usab sa maong panagtapok sila si Provincial Administrator Atty. Ralph Dela Cruz, Provincial Treasurer Evelyn Espra, Assistant Provincial Department Head Josephine Caligdong, ug Atty. Dexter Sejm Caligdong, kauban si Private Secretary Vivencia Labastida kinsa mi-representa kang Governor Edwin "Kuya Gob" Jubahib.