Naabot sa layong dapit sa Brgy. Kimamon, Santo Tomas ang libreng caravan of services nga hatod sa Oplan KKK (Kaagapay sa Kalinaw ug Kalamboan), dala sa Probinsiyal nga Panggamhanan sa Davao del Norte.

Gidugok karong adlawa, Hulyo 27, sa mga residente sa Brgy. Talomo, Lunga-og, Pantaron, ug Kimamon ang mga serbisyo nga dala sa matag opisina sa Kapitolyo, sama sa libreng check up, tambag legal, pagpanghatag og mga tambal, seedlings pananom, pagpabakuna sa mga kahayupan, ug mga pangkatilingbanong serbisyo.

Gawas niini, midalit usab og libreng werbisyo ang mga partner agencies, sama sa libreng gupit hatod sa mga kapulisan, National ID registration sa Philippine Statistics Authority (PSA), mobile civil registration sa Municipal Civil Registrar, pagparehistro sa PhilHealth Yakap Program, ug pagdalit og libreng eye screening ug antiara hatod sa De Veyra Optical Clinic.

Ang maong programa kabahin sa padayon nga pagpaningkamot sa administrasyon nj Governor Edwin “Kuya Gob” Jubahib ug Vice Governor Clarice Jubahib nga mahatod sa tugkaran sa matag Dabaonon ang ilang mga sukaranong panginahanglan, ug aron mapadayon ang kahapsay ug kalinaw sa probinsiya.

Nisuroy na ang Oplan KKK sa Brgy. Magwawa, Bobongon, San Miguel, ug sa Salvacian sa mga niaging adlaw. Nakatakda na muserbisyo na usab kini sa Brgy. Tibal-og karong semanaha bag-o pa man kini mulibot sa lahi nga siyudad sunod bulan.