Aron mapalambo ang rescue skills, koordinasyon ug panaghiusa sa mga responder, gipahigayon sa Probinsyal nga Panggamhanan sa Davao del Norte ang National Disaster Risk Reduction and Management (NDRM) 2026 Rescue Skills Competition sa Manaklay Beach Park Resort.
Miapil sa maong kalihokan ang siyam ka Local Government Unit (LGU) sa probinsya, diin ang Provincial Disaster Risk Reduction and Management Council (PDRRMC) DavNor ang nahimong facilitator niini.
Gipundok ang mga miyembro sa nagkadaiyang LGUs ngadto sa nagkalain-laing grupo aron dili magkahiusa sa usa ka team ang mga miyembro gikan sa parehas nga lungsod ug munisipyo.
Matud ni Provincial Risk Reduction and Management Officer Glenda Delideli, gihimo ang maong kalihokan aron mapalig-on ang panaghigalaay ug rescue skills sa mga responder, ilabina sa pag-atubang sa kalamidad.
“Ang tumong sa maong kalihokan nga ginapahigayon matag tuig mao ang pagpalig-on sa camaraderie, partnership, ug relasyon sa mga responder aron mas mapamilyar sila sa usag usa ug mas mapalig-on ang ilang panaghiusa,” ingon ni Delideli
Gisukod ang ilang kahanas pinaagi sa lima ka stations, lakip ang rubber boat handling ug maneuvering, map reading ug land navigation, underwater knot tying, ug vehicular crash extrication.
Samtang, sumala ni Eric Rosillo, ang kompetisyon nagsilbi usab nga praktikal nga assessment sa mga rescue team, lakip ang ilang kaandam sa pag gammit sa mga equipments alang sa water search and rescue ug uban pang operasyon.
Si Salve Joy Maan Narciso nga taga Braulio E. Dujali, miingon nga bisan kapoy ang mga kalihokan, importante kini aron ma-refresh ang ilang panghunahuna ug mahibalo sila sa hustong mga lakang nga buhaton sa dihang adunay ilang luwason.
Ingun usab ni Jovan Hermosilla sa Panabo City, daghan sila og nakat-unan sa maong kalihokan, dili lamang sa kompetisyon, kundili magamit usab nila kini sa mga posibleng rescue operations sa ilang lungsod.
“Daghan kaayo mi'g nakat-unan niini nga kompetisyon. Ang among mga nahibal-an magamit gyud namo sa aktuwal nga pagresponde kung adunay kalamidad sa among lungsod. Dako kaayo kini og tabang sa amoa nga mga responder,” sulti ni Hermosilla
Sa kinatibuk-an nga resulta, ang Team Foxtrot maoy nahimong kampeon ug midaog og ₱20,000, samtang ang Team Charlie mipatigbabaw isip second placer ug nakadawat og ₱15,000. Ang Team Delta nahimong third placer ug nakadawat og ₱10,000.
Human sa kompetisyon, gipahigayon ang meeting ug assessment sa Provincial Alliance of Disaster Risk Reduction and Management Officers aron hisgotan ang mga plano alang sa dugang pagpalambo sa rescue teams sa tibuok probinsya.
Photos: Vince Luna
