Gipasiugda ni Davao del Norte Governor Edwin I. Jubahib isip Regional Development Council (RDC) XI Chairperson ug MinDA Board Member ang mga umaabot nga dagkong proyekto sa probinsiya atol sa 23rd Mindanao Development Authority (MinDA) Board Meeting nga gipahigayon sa Marco Polo Ortigas, Pasig City.

Atol sa miting nga gipangulohan ni MinDA Secretary Leo Tereso Magno, gipaambit ni Jubahib ang plano sa probinsiya nga mu-host sa umaabot nga MY EXPO Davao del Norte International Halal Hub karong Oktubre 16 hangtod 18, 2026, sa pakigtambayayong sa MYEXPO Malaysia. Ipakita dinhi ang mga produkto gikan sa lainlaing industriya, inubanan sa mga investment, industry forums, ug ASEAN Bazaar, ug gilaoman nga makatigom kini og kapin 500 ka lokal ug langyaw nga mga investors.

Gipresentar usab ni Jubahib sa board ang gisugyot nga Waste-to-Energy Facility nga pagatukoron sa probinsiya, sa pakig-kolaborasyon sa SMA Ecogreen Corporation, aron matubag ang nagkadagko nga hagit sa solid waste management pinaagi sa usa ka mas episyente ug malungtarong pamaagi sa pagdumala sa basura.

Tungod sa potensyal nga benepisyo sa duha ka proyekto, gipahayag sa MinDa Board ang hingpit nga suporta niini, inubanan sa pagsang-at og duha ka resolusyon nga nagsuporta sa MY EXPO Davao del Norte International Halal Hub ug sa proposed Waste-to-Energy Facility.

Lakip usab sa mga nahisgutan sa maong miting ang mga direktiba gikan sa State of the Nation Address ni Presidente Ferdinand Marcos, Jr., mga deliverables gikan sa BIMP-EAGA Summit, mga bag-ong impormasyon mahitungod sa mgapaglinog sa rehiyon, ug mga estratehiya sa pagpalambo sa Mindanao.

Gipahayag usab ni Jubahib nga padayon ang paningkamot sa Probinsiyal nga Panggamhanan sa Davao del Norte sa pagpangita og oportunidad alang sa internasyonal nga kooperasyon ug pagpamuhunan nga magdala og dugang kalamboan sa tibuok lalawigan ug Mindanao, inubanan sa suporta sa MinDA Board.