Gidagsa sa mga lumulupyo sa Barangay Tibal-og, Barangay San Jose, ug Barangay New Katipunan sa lungsod sa Santo Tomas ang Oplan Kaagapay sa Kalinaw ug Kalamboan (KKK), diin gihatagan sila og nagkadaiyang libreng serbisyo gikan sa probinsyal nga panggamhanan sa Davao del Norte.
Gipangulohan ang maong programa ni Governor Edwin "Kuya Gob" Jubahib uban sa suporta ni Vice Governor Clarice Jubahib, mga department heads, ug mga empleyado sa Kapitolyo.
Atol sa programa, gipasabot ni Vice Governor Clarice Jubahib nga ang tumong sa Oplan KKK mao ang pagduol sa mga serbisyo ngadto sa mga komunidad aron dili na kinahanglan nga moadto pa ang mga residente sa Kapitolyo sa pag-avail sa mga serbisyo, ilabina ang mga nagpuyo sa layo nga mga lugar.
Dugang pa niya, adunay pondo alang sa mga nanginahanglan og maintenance medicines, ilabina sa mga senior citizens.
“Nakatigom usab ang Vice Governor's Office og 8 milyon pesos pinaagi sa suporta sa mga senador alang sa maintenance medicines sa mga nanginahanglan. Ginaaghat namo ang tanan nga magpalista aron makabenepisyo niini, lakip usab ang among livelihood program nga gitumong sa pagpalig-on sa adlaw-adlaw nga panginabuhi sa mga pamilya," ingun ni VG Clarice
Lakip sa mga serbisyong gihatud mao ang pagpanghatag og libreng bugas, abuno, binhi ug agricultural inputs, eye screening, libreng tambal, vitamins supplementation para sa kahayopan, deworming, rabies vaccination, castration sa mga iro ug iring, National ID registration, libreng gupit, libreng tsinelas, libreng masahe, legal advice ug pagproseso sa mga legal nga dokumento, ingon man ang pagpanghatag og school bags sa mga estudyante.
Dako usab ang pagpasalamat ni Barangay Tibal-og Captain Juvelyn Amar sa pagdala sa programa sa ilang lugar. Matud niya, dakong kaayohan kini alang sa katawhan ilabina sa mga nanginahanglan og serbisyo sa panglawas ug uban pang tabang gikan sa gobyerno.
“Salamat kaayo sa atong Governor Kuya Gob Edwin Jubahib uban sa iyang anak nga atoang Vice Governor, VG Clarice Jubahib sa pagdala niini nga programa dinhi sa among barangay.
Nagpasalamat gyud mi nga adunay mga lider nga nagtan-aw ug nag-atiman sa panginahanglan sa katawhan," sulti ni Amar
Padayon ang Oplan KKK sa paglibot sa tanang kabarangayan sa tinuok Davao del Norte aron ihatag ang kinasing-kasing nga serbisyo ngadto sa tanang Dabaonon.
