Alang tabang sa mga Dabaonong naghinam-hinam magka-negosyo, opisyal nang gilusad sa opisina ni Vice Governor Clarice Jubahib ang ‘Start In DavNor’, usa ka startup business support program, sa pakigtambayayong sa Provincial Administrator’s Office - Local Economic Development and Investment Promotion Division.
Gimugna ang maong programa aron matabangan ang mga Dabaonon nga nangandoy magsugod og negosyo pinaagi sa mentorship ug mga pagbansay nga makatabang sa pagpalambo sa ilang mga ideya ngadto sa malungtarong negosyo.
Matud ni VG Jubahib, tumong sa iyang opisina nga matabangan ang bisan kinsang Dabaonon nga adunay tinguha sa pagkab-ot sa ilang tibuok potensyal. Giawhag usab niya ang tanan sa pagpalambo sa ilang kapasidad ug sa pagtukod og lig-on nga network.
“Pag magsugod og negosyo, mahadlok jud ang uban kay kinahanglan jud na og capital. Apan ang kalampusan sa negosyo, dili lang jud kwarta ang kailangan ana. Magsugod ni sa kahibalo, hustong giya, ug maayong network... [Sa Start in DavNor] among ihatag ang trainings, mentorship gikan sa mga nagkadaiyang successful business owners, ug koneksyon sa mga eksperto ug partners nga makatabang sa ilang negosyo,” sulti sa bise gobernadora.
Gawas sa pinansyal nga suporta, gipasiugda usab ni VG Clarice nga importante nga adunay kaisog ang mga nagsugod pa lamang nga mga negosyante, apan dapat andam usab kini muatubang sa mga hagit nga maagian sa pagtukod og negosyo.
Kabahin sa paglusad sa maong programa, mihatag usab og inspirasyon ang mga Dabaonong negosyante nga sila Alexteir Alboroto, co-owner sa TagumPie, ug Jollibee Salazar, co-owner sa Bean o’ Clock, pinaagi sa pagtanyag sa ilang mga kasinatian ug sugilanon sa pagsugod ug pagpalambo sa ilang mga negosyo.
Gipaambit ni Salazar nga usa ka ‘calculated risk’ ang ilang gisugal alang sa pagsugod sa ilang negosyo. Gitambagan usab niya ang mga bag-ong negosyante nga magpadayon sa pag-innovate aron mapalambo ang ilang mga produkto ug serbisyo.
Samtang, migiya usab si Alboroto sa mga nangandoy mahimong negosyante nga gamiton ang mga kapanguhaan nga anaa na kanila ug himoong puhunan ang ilang passion sa pagsugod og negosyo. Matud pa niya, ang matag hagit angay tan-awon isip oportunidad aron mapalambo ang ilang mga produkto.
Giawhag usab ni Edsel Siasol, representante gikan sa Department of Trade and Industry Davao del Norte, nga pahimuslan ang daghang lokal nga kapanguhaan sa probinsiya aron mas mapakita ang pagkamamugnaon sa mga Dabaonon.
Sa opisyal nga paglusad sa ‘Start In DavNor’, gilauman sa probinsiyal nga panggamhanan nga mas daghan pang Dabaonon ang madasig sa pagpadayon sa ilang mga ideya ug mahimong malampuson nga mga negosyante.
