Gihatagan og dakong pagtagad ang himsog nga panlawas sa mga amahan sa pagtapok kanila sa gipahitabo nga DavNor ERPAT Mini-Olympics, niadtong Hulyo 31 sa DavNor Gym, DNSTC, Tagum City.
Pinaagi sa paghatag og lecture bahin sa reproductive health sa mga kalalakihan ug sa mga nagkalainlaing sakit nga makaapekto kanila, tumong sa maong aktibidad nga madungagan ang kahibalo og kusog sa mga amahan ilabi na nga sila ang nangulo sa ilang mga pamilya.
Gawas niini, nagtanyag usab og libreng digital rectal examination ang maong aktibidad alang sa mga miyembro sa ERPAT nga nanggikan pa sa nagkalainlaing mga barangay sa probinsiya. Nag-indigay usab sila sa championship game sa basketball, videoke king challenge, zumba, ug sa pag-ila sa pamilya nga adunay pinaka-produktibo nga tamnan sa mga gulay.
Sugyot ni Provincial Social Welfare and Development Officer Rosalinda Rapista, gipahigayon ang maong aktibidad aron mahatagan og gahom ang mga amahan nga mapalig-on ang ilang mga papel sa pagpatubo ug pag-atiman sa ilang pamilya.
Dugang pa niya, ang probinsiya sa Davao del Norte lamang ang padayon nga nagasaulog sa maong aktibidad ilawom sa rehiyon onse isip paghatag og bili sa tanang kasarian.
Gipahayag usab ni Governor Edwin “Kuya Gob” Jubahib ang iyang suporta sa maong kalihokan, diin iyang gihatagan og kabug-aton ang importansya sa kahimsog sa mga amahan sa pagpalambo sa matag panimalay sa probinsiya.
