Gipadayon sa Probinsyal nga Panggamhanan sa Davao del Norte ang kampanya batok sa Severe Acute Malnutrition (SAM) pinaagi sa ikaduhang hugna sa "Pangga Ko Si SAM" niadtong Hulyo 31, nga dungan nga gipahigayon sa Kapalong District Hospital alang sa SIKAT Cluster ug sa SP Building, Provincial Capitol alang sa NECTA Cluster.
Ang SIKAT Cluster naglangkob sa mga benepisyaryo gikan sa Sawata, Kapalong, Asuncion ug Talaingod, samtang ang NECTA Cluster alang sa New Corella ug Tagum City. Sa Kapalong, gipangunahan ni Vice Governor Clarice T. Jubahib, Chairperson sa Committee on Women, Children and Family Affairs, ang maong inisyatiba uban sa Provincial Health Office ubos sa pagdumala ni Provincial Health Officer Dr. Alfredo A. Lacerona, aron matabangan ang 67 ka kabataan nga nag-edad og 0 hangtod 5 anyos nga adunay Severe Acute Malnutrition.
Samtang, sa NECTA Cluster, ang mga pediatricians gikan sa Davao Regional Medical Center (DRMC) maoy mihiling sa kahimtang sa mga kabataan ug mitambag sa ilang mga ginikanan isip kabahin sa medical consultation ug nutrition intervention nga gihatag sa programa.
Lakip sa mga serbisyo ang medical consultation, pagkuha sa vital signs, nutrition counseling, pagpanghatag og hygiene kits, tambal, ug ang 120 ka adlaw nga feeding intervention. Matag 15 ka adlaw, makadawat ang mga benepisyaryo og gatas, bitamina, bugas, gulay ug uban pang nutritional supplements aron mapalambo ang ilang nutrisyon ug mabalik sa normal ang ilang timbang.
Matud ni Vice Governor Jubahib, "ang tinuod nga kalamboan apil ang katawhan." Nagpasalamat usab siya sa mga pribadong stakeholders ug partner agencies nga mitabang aron mapalig-on ang programa ug mapadayon ang tumong sa probinsya nga mapakunhod, ug sa umaabot mapapas, ang kaso sa severe acute malnutrition sa mga kabataan.
Giawhag usab sa bise gobernador ang mga ginikanan sa mga benepisyaryo nga mosalmot sa pansit-making livelihood program pinaagi sa pagpakigkoordinar sa iyang buhatan aron makabaton og dugang panginabuhian ug masiguro ang padayon nga husto nga nutrisyon sa ilang mga anak.
Kahinumduman, ang unang hugna sa "Pangga Ko Si SAM" gipahigayon niadtong Hulyo 24 pinaagi sa DCAPS Cluster sa Carmen District Hospital alang sa mga benepisyaryo gikan sa Braulio E. Dujali, Carmen, Panabo City ug Santo Tomas, dungan sa IGACOS Cluster sa Samal District Hospital, isip kabahin sa phased implementation sa programa sa tibuok Davao del Norte.
Writer/Photos: Lorna Tripoli
