Nagkadaiyang proyekto ang gibubu ug mga resolusyon ang giduso ni Governor Edwin “Kuya Gob” Jubahib isip suporta sa kapakanan sa mga kaigsuonang Muslim sa probinsiya.

Mao kini ang iyang gipadayag sa panagtapok sa Muslim community sa Bulwagan ng Karunungan Hall karong adlawa, Agosto 12, alang sa Seminar on the Role of Islamic Law in Muslim Communities.

Matod niya, kinahanglan nga dako ang pagsabot sa panggamhanan sa mga gikinahanglan sa komunidad, maong iyang gitutokan ang paggahin og pondo sa mga Madrasah schools isip suporta sa ilang edukasyon ug pagpangempleyo.

Gihulagway usab ni Jubahib isip kabulahan ang pagbisita sa prinsipe sa Malaysia sa probinsiya niaging bulan, tungod nagdala kini og oportunidad sa pagpamuhunan. Kahinumdoman nga aduna nay plano ang probinsiyal nga panggamhanan sa pagtukod og Halal Hub sa Davao del Norte, isip paagi sa pag-establisar sa probinsiya isip tinubdan sa mga Halal products sa nasud.

Gibutyag usab ni SMA Ecogreen Corporation President SM Anand Subramaniam ang pagkabilib sa mga prinsipe sa Malaysia kay Jubahib tungod personal kini nga miadto sa maong nasud aron mangita og oportunidad sa pagpamuhunan para sa probinsiya. Nagpadayon na ang mga plano ug dayalogo aron mapalambo ang maong kolaborasyon.

Matud ni Jubahib, kini iyang gipaningkamotan aron madugangan ang panginabuhian sa mga Muslim ug aron di na sila maglisod sa ilang mga panginahanglon.