Gikan sa 25 ngadto sa 50 ka hospital beds, mas taas nga quality ratings, nagkadaghang pasyente ug hapit ₱100 milyones nga income sa 2025—mao kini ang pipila sa mga kalamboang gipresentar sa Davao del Norte Hospital–Carmen Zone atol sa culmination sa National Hospital Week 2026.
Sa iyang State of the Chief of Hospital Address, gipadayag ni Acting Chief of Hospital II Ruchille S. Arrocena, MD, FPSMSG, MAHA nga misaka ang actual income sa ospital gikan sa ₱18.45 milyon niadtong 2021 ngadto sa ₱99.85 milyon sa 2025. As of July 2026, naka-generate na usab kini og ₱76.95 milyon, o 68.09 porsyento sa annual target niini.
Misaka usab ang gidaghanon sa mga pasyenteng na-discharge gikan sa 3,147 niadtong 2021 ngadto sa 8,296 sa 2025. Sa Enero 2023, giaprobahan usab ang pagpalapad sa authorized bed capacity sa ospital gikan sa 25 ngadto sa 50 ka higdaanan, pinaagi sa suporta sa probinsyal nga panggamhanan ug pag-apruba sa Department of Health.
Gipakita usab ni Arrocena ang pag-uswag sa kalidad sa serbisyo pinaagi sa DOH-Integrated Hospital Operations Management Program, diin gikan sa 68 porsyento nga rating niadtong 2020, nakaabot kini sa 94.25 porsyento niadtong Hulyo 2025.
Nakadawat usab ang ospital og mga national recognition, lakip ang Best in Infection Control Innovation niadtong 2022 ug 2023, ug Best Level I Hospital sa National DOH Hospital Awards. Nakab-ot usab niini ang four Green Stars nga adunay 91.81-percent rating niadtong Agosto 2025 ug nabalik ang pagkaila niini isip Mother-Baby Friendly Health Facility.
Padayon usab ang pagpalapad sa pasilidad. Human ma-turnover ang Hospital Administration Building niadtong Pebrero 2024, lakip sa ginaduso karon ang Out-Patient Department Building, fully air-conditioned OB-Gyne building, ug ang plano alang sa Green Hospital Building. Tumong sa ospital nga mahimong Level II hospital nga adunay 100-bed capacity.
Gipasalamatan ni Arrocena ang suporta ni Governor Edwin I. Jubahib, ang Department of Health, ug mga partner NGOs ug civic organization sama sa Rotary Club of Downtown Davao–District 3860, Panabo Dalisay Masonic Lodge No. 237, Kasilak Foundation, ug The Church of Jesus Christ of Latter-Day Saints sa ilang kontribusyon sa mga programa ug serbisyo sa ospital.
Kabahin usab sa culmination ang Gawad Parangal sa mga Kawani, diin giila ang mga empleyado sa ilang kontribusyon sa operasyon ug serbisyo sa ospital. Nanguna sa kalihokan ang kasamtangang Provincial Economic Enterprise and Development Officer (PEEDO) Dominic R. Basalo, MD, MPM, ug ang kanhing PEEDO Dennis B. Devilleres.
Writer: Jun Rey VillanuevaPhotos: DDH-Carmen Zone
