𝗢𝗽𝗹𝗮𝗻 𝗞𝗞𝗞 𝘀𝗮 𝗗𝗮𝘃𝗡𝗼𝗿 𝗴𝗶𝗱𝗮𝗴𝘀𝗮 𝘀𝗮 𝗺𝗴𝗮 𝗸𝗮𝘁𝗮𝘄𝗵𝗮𝗻

Gidagsa sa mga katawhan ang Oplan Kaagapay sa Kalinaw ug Kalamboan (KKK) sa DavNor Coliseum, Davao del Norte Sports and Tourism Complex (DNSTC), Barangay Mankilam, Tagum City, niadtong Septyembre 2.

Pinaagi sa maong programa, gipaduol sa mga nagpatuman ang nagkalain-laing libreng serbisyo sa gobyerno, ilabina sa mga nanginahanglan og tabang medikal, legal, ug uban pang serbisyo.

Adunay libreng konsultasyon ug check-up sa panglawas ug mata, lakip ang paghatag og libreng eyeglasses ug mga medisina ngadto sa mga benepisyaryo. Naghatag usab og tambag legal ug uban pang serbisyo nga gitanyag sa nagkalain-laing departamento sa kapitolyo ubos sa kamandoan ni Governor Edwin I. Jubahib ug Vice Governor Clarice Jubahib.

Nakab-ot ang maong kalihokan pinaagi sa suporta sa mga pribadong stakeholder, nagkalain-laing ahensya sa gobyerno, mga departamento sa Kapitolyo, ug uban pang kaabag sa programa.

Pinaagi sa hiniusang paningkamot sa mga partner ug service providers, padayon nga gipakusog sa Oplan KKK ang paghatod sa mga serbisyo ngadto mismo sa katawhan isip kabahin sa paningkamot alang sa kalinaw, kalamboan, ug mas maayong kaayohan sa mga lumulupyo sa DavNor.

Writer: Lorna Tripoli