Gatusan ka mga partisipante gikan sa 26 ka mga eskwelahan ug institusyon ang nagtigom alang sa 3rd Dabaonon Research and Development Regional Congress niadtong Septyembre 9, 2026, sa Bulwagan ng Karunungan, Mankilam, Tagum City, aron ipaambit ang nagkalain-laing research ug inobasyon nga makatampo sa pagpalambo sa mga komunidad.
Ang tinuig nga kalihukan gi-ko-organisa sa Probinsyal nga Panggamhanan sa Davao del Norte, pinaagi sa Provincial Information, Communication and Knowledge Management Office (PICKMO) ug Davao del Norte Learning Institute (DNLI), kauban ang Municipality of Kapalong pinaagi sa Kapalong College of Agriculture, Sciences and Technology (KCAST) ug ang Department of Science and Technology (DOST).
Kauban usab sa kalihukan ang Davao Region Association of Local Colleges and Universities, Jose Maria College Foundation, Inc., ug Tagum Doctors College, Inc.
Gipresentar sa mga researchers ang ilang mga papel ubos sa upat ka research clusters: Natural Sciences for Inclusive and Resilient Communities; Social Sciences for Inclusive and Resilient Communities; Development Initiatives for Inclusive and Resilient Communities; ug Institutional Research and Development.
Nagsilbing resource speakers sa maong kongreso sila Dr. Sophremiano B. Antipolo, CES, nga naghisgot sa temang “Building Resilient Communities Through Research, Innovation, and Collaborative Governance,” ug Dr. Rec E. Eguia, nga mipunting sa “Reimagining Inclusive Community Development Through Research, Innovation, and Collaboration.”
Gihatagan usab og dakong gibug-aton nila Governor Edwin I. Jubahib ug Vice Governor Clarice Jubahib ang papel sa research sa pagpalambo sa pagdumala ug serbisyo publiko, ilabi na isip basihan sa paghimo og tukma ug maayong mga desisyon alang sa kaayohan sa katawhan.
Pinaagi sa maong kongreso, padayon nga gipalig-on ang kolaborasyon tali sa probinsyal nga panggamhanan, mga lokal nga pangagamhanan, akademya, ug nagkalain-laing institusyon sa Davao del Norte ug sa tibuok rehiyon, aron magamit ang research ug inobasyon sa pagtubag sa mga panginahanglan sa komunidad ug sa pagpalambo sa serbisyo alang sa katawhan.
