Nagmalampuson ang gipahigayon nga nationwide fun run atol sa selebrasyon sa ika-126 Philippine Civil Service Anniversary, kung asa liboan ka mga kawani sa gobyerno gikan sa nagkalainlaing parte sa nasud ang misalmot karong adlawa, Setyembre 13.
Kapin sa gatosan ka mga manlalahok gikan sa nagkalainlaing ahensya sa Rehiyon Onse ang misalmot sa maong aktibidad, diin kini gipahigayon sa Davao del Norte Sports and Tourism Complex, Tagum City.
Sulti ni CSC Regional Director Prisco Rivera, Jr., dili lamang ang kabaskog sa panlawas ang gitutokan sa maong aktibidad. Gipahigayon usab kini aron pasidunggan ang kabilin sa mga kawani nga nakabsan og kinabuhi samtang nagatuman sa ilang mga katungdanan ug aron masuportahan ang ilang mga pamilya.
Gipunting sa CSC nga ang tanang kita gikan sa maong aktibidad maoy gamiton aron mapondohan ang Lingkod Bayani Program. Nagpasalamat usab si Rivera sa mga tig-organisa sa Fun Run, ilabi na sa Probinsiyal nga Panggamhanan sa Davao del Norte nga usa sa nahimong partner niini.
Karong tuiga, tulo ka kategorya ang giandam sa CSC Region XI, nga mao ang 10k Lingkod Bayani Elite Category, 5k Unity Category, ug 3k Wellness Category.
Usa lamang ang Nationwide Fun Run sa mga highlights ug aktibidad nga giandam sa CSC atol sa ika-126 PCSA. Gilaoman niini nga mas mapalig-on pa ang panaghiusa sa mga kawani sa gobyerno dili lamang sa Rehiyon Onse, apan sa nagkadaiyang sangay niini sa tibuok nasud.
