Ikatulong sunod-sunod nga nahimong Top 1 Best-Performing School sa tibuok nasud ang Davao del Norte State College (DNSC) sa 2026 Social Workers Licensure Examination (SWLE).

Nakakuha og 100% passing rate ang DNSC human makapasar ang tanang 66 ka examinees niini sa maong licensure examination.

Base sa resulta nga gipagawas sa Professional Regulation Commission (PRC), giila ang DNSC isip Top 1 Best-Performing School sa kategorya sa mga eskwelahan nga adunay 51 o labaw pa ka examinees ug nakakuha og labing menos 80% passing rate.

Gipasidunggan sab sa tulunghaan ang kalampusan sa 66 ka mga examinees ug sa ilang mga magtutudlo gikan sa Institute of Leadership, Entrepreneurship, and Good Governance (ILEGG), ilabi na sa faculty sa Bachelor of Science in Social Work program.

Gilauman sa institusyon nga ang kalampusan mahimong inspirasyon sa mga bag-ong social workers sa pagpadayon sa ilang kontribusyon sa pagpa-uswag sa nasud.