Nakasulod pag-usab ang Davao del Norte sa Top 5 Most Business-Friendly Provinces sa tibuok Pilipinas sa 2026 Most Business-Friendly Local Government Unit (MBFLGU) Awards sa Philippine Chamber of Commerce and Industry (PCCI).

Gipagawas sa PCCI ang listahan sa Top Five LGUs ug finalists kagahapon, Setyembre 17. Ang pagpili sa mga mananaog nakabase sa mga musunod nga sumbanan: Good Governance, Ease of Doing Business, Digital Transformation, ug Sustainable Local Economic Development.

Kauban sa Davao del Norte sa Top 5 sa provincial category ang Camarines Sur, Cavite, Iloilo, ug Tarlac.

Ang pasidungog nga nasakmit sa DavNor resulta sa komprehensibong assessment sa katakos ug mga paningkamot sa lokal nga panggamhanan ubos sa liderato ni Governor Edwin “Kuya Gov” Jubahib, kauban ang pwersa sa Sangguniang Panlalawigan sa panguna ni Vice Gov. Clarice Jubahib, sa pagmugna og business-friendly ug “enabling environment” nga makatabang sa pagpadayon ug pagpalambo sa mga negosyo, pagpamuhunan, ug lokal nga ekonomiya.

Dili na bag-o sa DavNor ang maapil sa maong prestihiyosong national recognition. Niadtong 2019, nasungkit niini ang unang ganti sa Most Business-Friendly Local Government Unit Award – Provincial Category, sa unang tuig sa pagserbisyo ni Governor Jubahib. Sukad niadto, padayon nga nakakuha og national recognition ang probinsya tungod sa mga programa ug inisyatiba niini sa business-friendliness ug competitiveness.

Ang Top Five mopadayon sa Final Judging, diin ilang ipresenta atubangan sa Board of Judges ang ilang mga programa, inisyatiba, ug best practices sa pagpalambo sa business environment ug lokal nga ekonomiya sa ilang tagsa-tagsa ka probinsya.

Dugang garbo alang sa DavNor ang pag-ila sab sa mga component LGUs niini isip finalists sa ilang tagsa-tagsa ka kategoriya: Panabo City ug Tagum City alang sa 2026 MBFLGU – City Level 2; ug Carmen ug Santo Tomas sa 2026 MBFLGU – Municipality Level 2.