Kay posibleng dili madayon ang Barangay ug Sangguniang Kabataan Elections (BSKE) karong tuiga, gihagit ni Governor Edwin “Kuya Gob” Jubahib ang tanang mga opisyales sa barangay nga padayong ihatag ang insakto ug dekalidad nga serbisyo sa katawhan.

“Hangyo nako sa inyoha, ipadayon unsa ang inyong serbisyo, unsa ang inyong pagpaningkamot para sa pagserbisyo para sa inyong mga constituents matag-barangay. Ipakita sa katawhan nga bisa’g walay eleksiyon, ang ilahang barangay captain, barangay councilor, ug functionaries padayon nga naga-function para sa pagserbisyo sa katawhan,” sulti ni Kuya Gov sa mga barangay officials.

Kini ang awhag sa gobernador atul sa pagpang-apud-apud sa mga tseke gikan sa Bawat Barangay Makikinabang Program sa mga barangay sa Panabo City, Carmen, Santo Tomas ug B.E. Dujali, kagahapong adlawa, Septyembre 17, 2026.

Ilawom sa maong programa, ang matag-barangay makadawat og tag-P200,000 kada usa ubos sa Socio-Civic Projects Fund (SCPF), nga gipondohan sa Office of the President,

Ipatuman kini pinaagi sa pagbahin sa pondo, diin ang P100,000 gamiton alang sa proyekto sa barangay, samtang ang laing P100,000 gitagana alang sa lima ka mga Presidential Scholars matag-barangay, aron matabangan sila pagtapos sa kolehiyo.

Ang pondo sa SCPF alang sa Davao del Norte, nga nagkantidad og P44,600,000, gitunol mismo ni President Ferdinand Marcos, Jr. kang Kuya Gob gikan, atul sa pagbisita sa presidente sa Davao de Oro sa nagligad nga bulan.

Apil sab nga mihagit si Vice Governor Clarice Jubahib sa mga kapitan sa pagsiguro nga gamiton sa sakto ang pondo gikan sa nasyonal nga panggamhanan.

“Akong hangyo nga gamiton ninyo kini sa tama. Transparent. Atong isiguro nga matag-piso aning kwartaha makita sa katawhan. Makita nila ang resulta ug ilang mabatian kini,” maoy panawagan ni VG Clarice.

Kini gisegundahan sab ni 2nd District Congressman Jose Manuel Lagdameo sa pagsulti nga, “Sama-sama nating ipagpatuloy ang aksiyon at serbisyo para sa mas maunlad na Distrito Dos ng Davao del Norte.”