Gipailalom sa validation ang Kawsa sa Agrikultura ug Panginabuhian sa Barangay (KAAGAPAY) isip usa sa mga programa nga misalmot sa Galing Pook Award niadtong Setyembre 23 sa PGO Conference Hall.
Gipangulohan ni Vice Governor Clarice T. Jubahib ang presentasyon ug pag-atubang sa mga pangutana sa Galing Pook Validation Team atol sa maong kalihokan. Iyang gipatin-aw ang implementasyon, kalampusan, ug epekto sa KAAGAPAY ngadto sa mga benepisyaryo sa probinsya.
Mitambong usab sa forum sila Provincial Administrator Atty. Ralph Dela Cruz, Board Member Ronald Eliot, KAAGAPAY Lead Arnel Montero, Technical Working Coordinator Alphabet Gulanes, mga department head, mga sakop sa 68th Infantry Battalion sa Philippine Army, KAAGAPAY staff, ug mga presidente sa People’s Organizations (POs).
Ang Davao del Norte usa sa 208 ka local government units (LGUs) nga misumite og mga dokumento alang sa Galing Pook Award. Gikan niini, 34 ka LGUs ang gipili alang sa validation, lakip ang probinsya sa DavNor.
Gipakita sa probinsya ang KAAGAPAY isip usa sa mga programa nga gitukod ni Governor Edwin I. Jubahib aron matubag ang kakulang sa pagkaon panahon sa pandemya. Gipalapdan usab sa programa ang mga oportunidad sa panginabuhian sa mga benepisyaryo pinaagi sa agrikultura ug uban pang livelihood projects.
Gisusi sa validation team nga gilangkuban nila Carlos Manlupig, Executive Director sa Balay Mindanao, Silvestre Barrameda Jr. sa National Resilience Council, ug Adonis Cabalero sa Galing Pook Secretariat ang implementasyon ug epekto sa programa sa mga komunidad.
Gidala usab ang validation team ngadto sa mga lugar sa benepisyaryo aron personal nga makita ang ilang mga proyekto ug mga produkto nga nahimo ubos sa KAAGAPAY.
Sa pagkakaron, 1,046 ka People’s Organizations ang natukod ubos sa programa. Lakip niini ang 13 ka POs nga gilangkuban sa mga kanhing rebelde o Friends Rescued, 129 ka POs gikan sa Indigenous Communities, ug 409 ka POs nga nahimutang sa geographically isolated and disadvantaged areas o GIDA.
Nagpatuman ang KAAGAPAY og nagkalain-laing livelihood projects sama sa pag-atiman og isda, pagbuhi og manok, ug pagpananom og mga gulay. Gisugdan na usab sa probinsya ang palay buying ug pagpananom og mais isip dugang nga oportunidad alang sa mga mag-uuma ug benepisyaryo.
Nagpadayon usab ang probinsya sa paghatag og suporta pinaagi sa Sustainable Livelihood Program (SLP) ug sa buy-back scheme alang sa mga produkto sa mga benepisyaryo.
Pinaagi sa padayon nga pagpalig-on sa agrikultura ug panginabuhian, gitumong sa KAAGAPAY nga mapadayon ang mga oportunidad sa kita ug produksyon sa mga komunidad sa DavNor.
Writer: Lorna TripoliPhoto: Bembem Ulay
