Gihatagan og bag-ong kahibalo ug praktikal nga skills sa pagnegosyo ang mga empleyado sa Probinsyal nga Panggamhanan sa Davao del Norte pinaagi sa duha ka adlaw nga livelihood training sa DavNor Tech-Voc Center, Tagum City.
Gisentro sa training ang tema nga “On the Roll: Smart Strategies for Food Cart Success,” nga nagtutok sa mga estratehiya sa pagdumala ug pagpalambo sa food cart business.
Pinaagi sa maong pagbansay, nakakat-on ang mga partisipante sa lain-laing aspeto sa pagnegosyo, lakip na ang pagplano ug pagdumala sa negosyo, pagdumala sa pinansiyal, pagpamaligya, ug uban pang pamaagi aron mahimong mas epektibo ug malampuson ang ilang food cart business.
Gidumala ang kalihokan sa Provincial Human Resource Management Office kauban ang Provincial Public Employment Service Office (PESO).
Kabahin kini sa mga programa sa Probinsyal nga Panggamhanan sa Davao del Norte aron mapalambo ang kapasidad sa mga empleyado pinaagi sa mga skills ug kahibalo nga mahimo nilang magamit dili lamang sa trabaho, apan usab sa pagpalambo sa dugang nga panginabuhian.



