HANGTOD Disyembre 28, 2017, mikabat na ug P316.6 milyones nga danyos sa agrikultura ug imprastruktura ang naagoman sa probinsya sa Davao del Norte gumikan sa pagbaha tungod sa ulan dala sa bagyong “Vinta” (international name ‘Tembin’).

  

Tungod niini mipahinabo ug emergency meeting ang Provincial Disaster Risk Reduction Council (PDRRMC) Huwebes, Disyembre 28 ug gipasar ang usa ka resolusyon nga giduso ngadto sa Sangguniang Panlalawigan nga magbutang sa tibuok probinsya ilawom sa State of Calamity.

Ning pagsulat, una nang nagdeklarar ug State of Calamities ang mga LGUs sa Kapalong, Asuncion, ug Carmen.

“Mo-declare ta tungod kay mas broader gyod ang epekto ug daghan na pod ang mga LGU ang nag-declare, so dapat mo-declare pod ang probinsya aron pod makatabang unsa man tong mga hinanali ug mga pag-restore  or rehabilitation nga pwedeng matabang sa mga affected LGUs,” matod ni LDRMM Officer Ms. Glenda Delideli.

Ang lungsod sa Asuncion ang nakaagom ug pinakadakong kadaot sa agrikultura nga mikabat ug halos P108 milyones ka pesos nga nag-apektar sab ug 13,640 ka pamilya kun 68,200 ka tawo. Gisundan kini sa Sto. Tomas nga sobra P71 milyones nga danyos, Braulio E. Dujali, Kapalong, New Corella, Carmen, Tagum ug Talaingod. Ang natigom nga taho labot sa danyos gituohang motaas pa sanglit ang naigo sa kalamidad nga mga LGUs wala pa makasumiter sa ilang pinal nga report.

Sa emergency meeting sa PDRRMC nasayran nga ang nabilin nga Quick Response Fund sa mga tuig 2013, 2014, 2016 ug 2017 nga mokabat ug sobra P41 milyones gamiton aron sa pagtubag sa gikinahanglang tabang sa mga biktima.

“That will be added to the 2018 calamity fund of around 82.9 million. Our calamity fund next year plus this one kung naay mga balances plus the 70% roughly around a 100 million next year. Hopefully walay mga baha ug uban pang kalamidad,” matod ni Provincial Administrator Samson Sanchez uban ang panghinaut nga wala na unta’y moabot nga kalamidad sa 2018.

Apan bisan pa modernong kagamitan ug pagka-andam sa PDRRMC ug mga MDRRMCs lakip na ang pre-emptive nga pagbakwet, may nakalas gihapon nga kinabuhi sa baha tungod sa dili pagpaminaw sa mga pahimangno.

“We have their monitoring nga ang source gikan sa Europe, ang source gikan sa Japan, gikan sa Guam, US, we also have the PAGASA. . Naa dinha earthquake monitoring; mahibal-an nato asa ang naay may earthquake tibuok kalibotan kay motingog nga naay earthquake. . . . So that’s how equipped we are. Mao na nga kung moingon gyod sila nga i-preemptive labi na ug bagyo tuo na lang gyod kay di gyod na sila gabuot-buot nga mag-preemptive kay ma-estimate man ang speed ug volume sa water nga gisuyop sa eye of the storm. We invested for that, of course the investment goes with it nga dapat zero casualty,” pagpasiugda ni PA Sanchez sa angay’ng buhaton sa mahimong apektado aron malikayan ang pagkakalas sa kinabuhi.

Gilaoman nga ang DavNor SP mohimo ug special session alang sa giduso nga resolusyon sa PDRRMC sa dili pa mahuman ang tuig 2017.