Dili lang usa apan tulo gayod ka “conjugal rooms” ang gihimo aron matubag ang sekswal nga panginahanglan sa minyo nga mga preso sulod sa Davao del Norte Provincial Rehabilitation Center (DavNor PRC).

Bisan kung sulod presohan ang mga “bakasyonista” (termino alang sa mga preso kay dili sila magdugay), gihatagan kini ug dakong pagtagad sa administrasyon ni Gobernador Anthony del Rosario pinaagi sa mga programang Alternative Learning System (ALS), Livelihood Trainings sama sa welding ug souvenir items making gawas pa sa regular nga programa sa maayong panglawas, espirituwal ug moral nga panginahanglan aron dili mabiyaan samtang napreso. Plastado na ang “Balik Eskwela sa Selda” nga programa alang sa wala makahuman ug elementarya o hayskul nga pinireso.

“Dili maayo nga atong pasagdahan ang atong mga bakasyonista. Although nakasala sila pero dili ingon nga ato nalang pasagdahan. . . . need pod nila. . Pirmero gyod nato nga requirements naa gyod silay marriage certificate. . original jud,” matod ni OIC-Provincial Warden Marlyn Erolon labot sa kinahanglanon una pa makagamit sa gi-inagurahan nga conjugal rooms. 

Ang magtiayon mo-donar lang ug maintenance fee nga P100 ug ang gidugayon sa sulod nagdepende sa gidaghanon sa nagpa-eskedyul.

“Bahin-bahinon ang 8 hours sa pila ka nag-request . . .  Actually libre na. . pero naa lang sila’y maintenance. . kay ang pahumot. . mao nga mobayad sila ug P100 per couple. .  depende sa kadaghanon nga nag-request pwede mag three hours, four hours. . . kung gamay lang ang nag-request taas-taas pod ilang oras ma-avail, mao lang gihapon ang ilang donation,” pasabot ni Ms. Erolon.

Niadtong Hunyo 15, giturn-over sa BJMP ang pagdumala sa DavNor PRC uban ang 200 ka mga preso apan hangtod Myerkoles, Oktubre 18, 174 ka “bakasyonista” na lamang ang nabilin tungod sa paspas nga pag-follow-up sa kaso sa mga inmates. . 

“Tungod sa paspas nga pag follow up nato sa mga kaso sa atong inmates ug paspas pod ang atoang mga judges. . . mostly released,” padayong pasabot sa OIC provincial warden nga ang Inmates Welfare and Development ila gyod gi-aplikar.

75% sa mga bakasyonista (preso) dunay kaso labot sa druga apan malipayon si Ms. Erolon kay wala silay nasakpan nagpayuhot ilegal nga droga gikan niadtong Hunyo 15 gawas sa pipila nga nasakpan nga magpayuhot unta ug kutsara, cellphone ug lighter.  

“Naa na ta’y mo-graduate sa welding nga 23 na sila ka buok. . .  Dako kaayo ug tabang ang programa ni Governor. . . naa ta’y seminar gikan sa TLDC aron dili lisod mo-capital kung molaya na sila. . supportive man si gob,” padayong pasabot ni Ms. Erolon.

Atol sa National Correctional Consciousness Week gi-inagurahan Myerkoles, Oktubre 18 ang tulo ka kwarto nga mag-silbing dapit alang sa sekswal nga relasyon sa mga minyo sa dihang moduaw ang ilang mga asawa o bana Myerkoles hangtod Domingo.


 

More Davnor Updates at

DavNor Karon

 

DavNor News