Bisan sa ilang managlahi nga organisasyon, panglantaw ug opinyon, nagtapok ug naghiusa ang mga sakop sa print, radio, tv ug online Davao del Norte media sa pagtapos sa bulan sa Oktubre ingong Press Freedom Month pinaagi sa usa ka Fun Day, Oktubre 30, 2017 didto sa Lanikai, Hijo Estate Resorts, Inc.

Gikan pa niadtong tuig 2008 ilawom sa Provincial Ordinance No. 2008-002, giila na sa probinsyal nga panggamhanan sa Davao del Norte ang papel sa lokal media ingong kauban sa pagsabwag sa impormasyon alang sa kalamboan ug naglain sa bulan sa Oktubre ingong Press Freedom Month. Ang tuig 2017 nagdala sa tema “DavNor Media: Sumbanan sa Panaghiusa, Dalan sa Kalamboan.”  

Bisan kung wala si gobernador Anthony del Rosario sa kiliran sa mga media, iyang gipadala ang iyang video call gikan sa California, USA.

“Ako nagahinaut nga ang tanang media practitioners sa atong probinsya magpadayon nga motabang sa paghatag ug mga impormasyon gikan sa probinsya paingon sa atong mga lumulupyo sa Davao del Norte.  Pinaagi sa inyong tabang importante atong mapatunhay ang panaghiusa ug kalinaw sa atong probinsya sa Davao del Norte. Isip gobernador ang atong tuyo mao ang panahiusa sa tanang katawhan ilabina sa atong mga opisyales sa Davao del Norte. . . Importante gyod na nga mapabilin nato, mapatunhay nato alang sa atong lumulupyo tungod kay ang tuyo man gyod nato or ang atong damgo o tinguha nga ang Davao del Norte mahimong usa ka malamboon nga probinsya ilabina nga ang Davao del Norte magpabiling The BEST. . . kamo pod nga mga media practitioners I hope that you will also help in the unity of our province ilabina karong panahona,” matod ni Gobernador Anthony del Rosario.

Gihisgotan sa gobernador ang kaimporante sa panaghiusa sa lokal nga mga opisyales niadtong 2016 hinungdan nga midaug ang kasamtangang mga opisyales ug nahimong presidente si Presidente Rodrigo Duterte.

“In 2016 kitang tanan nagtinabangay para modaug ang atong Presidente Digong Duterte ilabina sa tanang opisyales nga naglingkod karon sa kasamtangan sa atong probinsya sa Davao del Norte. Of course very important sa atong distrito I, ang atong kasamtangan Speaker of the House, Speaker Bebot Alvarez, para makalingkod sila isip mga dagko nga mga opisyales para makahatag ug dakong serbisyo ug tabang sa atong katawhan. . .importante nga ato pod silang suportaran para mapadayon ang mga gwapong proyekto nga moabot gyod sa atong probinsya sa Davao del Norte,” padayong mensahe sa gobernador pinaagi sa video call.

Halos walay nakasagol sa mga media gikan sa Davao del Norte nga pulos malipayong mipauli human sa gihimong usa ka adlaw nga lingaw-lingaw.


 

More Davnor Updates at

DavNor Karon

 

DavNor News