News

Kuya Gov malipayon sa pagsulod sa daghang ayuda sa Probinsya

Details

Published: Monday, 01 April 2024 17:04

Written by DavNor PICKMO (Nestor H. Mata, Jr.)

Views: 194

Dili mobabag si Governor Edwin “Kuya Gov” Jubahib sa pagsulod sa ayuda alang sa mga katawhang biktima sa pagbaha dinhi sa probinsya. Kini ang giluwatang pahayag ni Tagum City Vice Mayor Allan L. Rellon atol sa KAAGAPAY Food Relief Distribution nga gipahigayon sa Brgy. Liboganon, Tagum City.

“Unfair kaayo sa nagpangdaot kang Kuya Gov karon. Kanang issue sa AICS nga ang giingon karon sa mga media ug pipila ka mga leader nga iya daw’ng gibabagan ang kining mga ayuda sa nasyonal. Tungod daw sa iyang pagsaba-saba sa senado ang uban wala mahatagan. Sa pagkatinuod lang, ang hunahuna’g kasingkasing ni Kuya Gov, bahala na’g ilampas dili moagi sa iyaha ang pondo sa nasyonal o lahi nga politiko ang moingon nga sa amoa ni gikan. Ang iya lang basta mahatag ang tama. Dili tong istorya ba nga P10,000 bawasan og P9,000,” sumala ni Rellon.

Dugang ni Rellon nga nalipay si Kuya Gov sa kadaghan sa mga ayudang nisulod dinhi sa probinsya ilabi na sa Siyudad sa Tagum. Gipasalamatan ni Rellon ang gobernador gumikan sa makanunayong pag-amuma niini sa iyang mga ginsakopan. Kalakip sab sa gipasalamatan niya, si Bise Presidente Inday Sara Duterte nga maoy nag-unang opisyal gikan sa nasyonal nga nipadala’g ayuda dinhi sa probinsya.

Sa mensahe ni Governor Jubahib pinaagi sa iyang Executive Assistant Atty. Eva Loraine Estabillo, gihimakak niini ang mga fake news nga nanggawas kabahin sa P30,000,000 nga ayudang gihatag ni Presidente Ferdinand Marcos, Jr., diin mohatag kuno og tag-P5,000 ang probinsyal nga panggamhanan ngadto sa mga nabahaan gamit ang maong kwarta.

“Ang P30 million, ipanghatag ni Kuya Gov pero dili cash. Dili man mahilig si Gov manghatag og ayuda nga cash. So, items gihapon ang ihatag ni Gov. Ayaw mo’g tuo kintahay adunay magmarites sa inyoha nga moadto’g kapitol kay naay ayuda nga cash ihatag si Gov,” matud ni Estabillo.

Dugang ni Estabillo nga naglaom si Kuya Gov nga ang tanang mga nabahaan dinhi sa probinsya makadawat sa ayuda gikan sa nasyonal nga panggamhanan labi na sa ECT kon Emergency Cash Transfer gikan sa Department of Social Welfare and Development Office balor P9,960 matag usa.

Kapin lima ka libo ka mga benepisyaryo nga sakop sa Brgy. Magdum, Brgy. Magugpo North, Brgy. Pandapan, Brgy. Nueva Fuerza, Brgy. New Balamban, Brgy. San Agustin, Brgy. Busaon, ug Brgy. Liboganon ang nidawat sa ayuda gikan sa Office of the Vice President ubos sa pakig-alayon sa Probinsyal nga Panggamhanan sa Davao del Norte. Lulan sa maong ayuda ang lima ka kilong bugas ug mga delata.

Niduyog sa pagtunol sa maong ayuda ang mga opisyales sa probinsyal nga panggamhanan ug sa Siyudad sa Tagum sama nila Board Member Nicandro Suaybaguio, Jr., BM Prospero Estabillo, Jr., BM Francisco Remitar, Konsehal Atty. Ana Alvarez, Konsehal Jan Dmitri Sator, ug Konsehal Ronald Eliot.